Мектеп жангы излемлеге келиширикди

Чегемде «Билим бериу» миллет проектге кёре, Кардановла атлы орамда сегиз жюз окъуучугъа юч къатлы мектепни къурулушу барады. Ол беш корпусдан къураллыкъды, уллу терезелери, кенг коридорлары, эркин класслары эм компьютерден аралары да боллукъду.

Бюгюнлюкде подряд организацияны келечилери мурдорун салып бошай турадыла, башха жумушланы да тамамлайдыла. Аны бла бирге корпусланы биринде биринчи къатыны  къабыргъаларын къалап бошап, плитала салыргъа  башлагъандыла.

Ишле болжалдан кеч къалмай тамамланадыла, энчи техника, материал да жетерча барды. Планнга кёре, объект быйылны ахырына битерге керекди.

Сагъынылгъан проектни чеклеринде буруннгу жылда Чегемде 500 окъуучугъа мектеп ишленнгенди. Аны къатында уа «Демография» миллет проектге тийишлиликде 140 гитчеге сабий сад сюелтилиннгенди. Жангы микрорайонда башха районладан кёчген танг кесек жаш юйюр жашайды. Ол себепден школгъа бла сабий садха баргъанланы толусунлай жерле бла жалчытыргъа онг табылгъанды.

Жангы излемлеге келишген мектеп бусагъатда бир сменни ишлейди эм аны бла борчун толтуралады. Мында, тёрели дерследен тышында, чыгъармачылыкъ жаны бла кружокла, спортдан секцияла эм башха бёлюмле да ачылгъандыла.  

Эсге сала айтсакъ, «Жангы мектеп» федерал программа «Билим бериу» миллет проектге киреди. Аны баш магъанасы – сабийлени жерле бла жалчытыргъа эм тийишли билим алдырыргъады.