Эл мектепни тамбласы бизни къолубуздады

Билим бериуге, ёсе келген тёлюлени юйретиуге, заманны излемлерине кёре, аслам эс бурулады. Терс-Къолда бу иш къалай къуралгъаныны юсюнден элни орта школуну директору Залийханланы Лейля билдиргенди. 

Эл жашауда мектепни жери, жангыз билим бериу системада угъай, не заманда да энчи болгъанды. Нек дегенде, мектеп энчи программа бла билим берген жангыз учрежденияды, аны юсю бла элни жаш тёлюсю саулай ётеди. Сора, школ юйретиу иш бла кюрешген жангыз жамауат-къырал институтду, ол битеу муниципал къуралыуну социо-культура арасы болуп къалады. «Биз билим бериуню федерал стандартына кёре юйретиу-окъутуу ишни игилендириу бла дайым кюрешебиз. «Мектеп – элни социо-культура арасы», «Биригиуден – айныугъа» проектле, «Бирге тамамлайбыз», «Жер-жерли халкъны журтла жаны бла жарыкъландырыу» волонтёр программаланы толтурабыз, «Общественно-активные школы России» битеукъырал къымылдаугъа къатышабыз.

Битеу бу мадарла социо-маданият майданны къурауда устазланы, ата-аналаны бла жамауатны кючлерин бирикдирирге болушадыла», - дейди. Мында иш хар окъуучуну айныууну энчиликлерине, билимине, сейирлерине, фахмусуна кёре къуралады. Аны кёз къарамына эс бурулады, устаз бла окъуучу бир бирлерин «эшитедиле». Билим бериу ачыкъ халда бардырылады, сабийле социал магъаналы жумушлагъа къатышырларына, элни бла мектепни араларында байламлыкъла кючлерлерине къайгъырылады. Мектепде фахмулу устазла ишлейдиле, ала юйретиуден тышында, окъуучуланы олимпиадалагъа, эришиулеге хазырлайдыла, ол ахшы эсеплеге да келтиреди. Ала «Жылны устазы» регион конкурсха дайым къатышадыла, волонтёрство бла кюрешедиле. Керек болса, психологну, консультантны, социологну борчларын да тамамлайдыла. 

Проблемаланы юслеринден айта, ол баш жарсыуладан бири демография бла байламлы болгъанын, сабийле аз туугъанларын айтады.  Жаш специалистле да школгъа ишлерге аз келедиле. Выпускниклени иги кесеги къыралны даражалы вузларына киргендиле, алай педагогика усталыкъны уа сайламагъандыла. Аны сылтауу ачыкъды: иш хакъны азлыгъы, ишчи жашау журтла берилмегени, социал льготаланы жокълугъу.

- Эл сакъланыр ючюн, билим бериу адамланы сакълауларына, жамауатны, юйюрню излемлерине тийишли болургъа керекди, - дейди Залийханланы Лейля. - Качестволу юйретиу социумну болуму бла къысха байламлыды, билим бериу учрежденияны ёхтемлиги аны къаллай бир выпускниги вузлагъа киргени угъай, ала элде жашауну игилендириуге къаллай къошумчулукъ этгенлериди. Абаданла да, жаш тёлю да тамамлагъан ишледен къуралады эл жашаугъа кёз къарам, жангызда алай ангылашынадыла аны ахшы жанлары эм аны юсю бла сакъланадыла маданият бла адет-тёреле. Бюгюнлюкде эллени айнытыуну кёп тюрлю амаллары бардыла. Бек алгъа уа, билим бериу сабийлени окъутуудан тышында, жамауат башламчылыкъланы, информация-жарыкъландырыу эм физкультура-спорт арасы болургъа тийишлиди. Эл мектепни юсюнден сагъышла, школ кеси кибик, жангы тюйюлдюле, алай ол тамбла къалай боллугъу бизни къолубуздады.