Ичгини онлайн халда сатыуну тыяр жанлыдыла

Къырал Думаны депутатлары ичги затланы интернет бла сатыу-алыуну тыяргъа кереклисин айтхандыла. РФ-ни Финансла министерствосуна ол жаны бла башламчылыкъны инсанланы ичгиден, наркотикледен бла тютюнден къоруулау жаны бла  фракцияла аралы ишчи къауумну жыйылыуунда къабыл кёргендиле.

 Ичгини интернет бла сатыу-алыуну тыяргъа кереклисини юсюнден 2017 жылдан бери айтылады. Финансла министерство алгъаракълада бу ишни бир низамгъа келтирлик законну  проектин хазырлагъанды. РФ-ни Къырал Думасыны башчысыны орунбасары   Шолбан Кара-оол айтханыча, анга кёре, аракъыны, аныча башха суусунланы «Россейни почтасыны» ресурслары бла сатаргъа белгиленеди.

 - Къыралны инсанларыны 76 проценти ичгини хайырланнганларын айтадыла, аладан 35 проценти   кеслерин аз ичгенлеге санайдыла – айгъа 3-4 кере. Социология тинтиулеге къатышханланы 4 проценти   ичгисиз болалмагъанларын айтхандыла. Россейде 5 миллион адам ичгичиликден ауруйду. Ала кеслерине бакъдырадыла, жашаугъа къайтыргъа кюрешедиле,-деп белгилегенди    Шолбан Кара-оол.

Финансла министерствогъа ичги затланы онлайн халда сатмазгъа деген башламчылыкъны къоркъуусузлукъ эм коррупциягъа къажау комитетни депутаты Бийсултан Хамзаев этгенди.

 - Адам юйюнден да чыкъмай, диванда жатханлай, аракъыны аллына келтиредиле.  Саулукъ сакълау министерство бла МВД къажау нек болгъанларын ангылайбыз. Бюджет толтурулады, врачла бла полициячыла уа ичгичилени багъадыла, бузукълукъ этселе тутадыла. Аракъыны интернет бла сатаргъа эркин этерге дегенле юч ахшылыкъны белгилейдиле: адамлагъа ол тапды, чырмаула жокъдула эмда жалгъан ичги боллукъ  тюйюлдю. Алай ала алдагъан этедиле. Ичгини интернет бла сатыу къыралны он жылгъа артха атарыкъды,-дегенди Хамзаев.

 Аракъыны онлайн халда сатыугъа къажау башха депутатла да сёлешгендиле. Граждан обществону айнытыу, жамауат эм дин биригиулени соруулары жаны бла комитетни башчысыны биринчи орунбасары   Николай Бурляев   Саулукъ сакълауну халкъла аралы организациясы ичгини наркотикге тенг этгенин эсгертгенди. «Демографияны къалай ёсдюраллыкъбыз, ёлгенлени саны туугъан сабийледен эки кереге кёп болса»,-дегенди ол.

КПРФ-ни фракциясыны башчысыны  биринчи орунбасары  Николай Коломейцев а Россейни почтасын кесини борчларын толтурургъа чакъыргъанды. «Газетлеге бла журналлагъа жазылыуну кёбейтиу бла кюрешсинле. Аракъыны сатыу а игиликге келтирлик тюйюлдю»,-дегенди ол.

 Саулукъ сакълау министрни орунбасары Евгения Котова аракъыны онлайн халда сатыу кийирилгени бла ичгичилен саны ёсегирин белгилегенди. «Адамгъа юйюню ичинде, отоуундан чыкъмай  ичерге эркинлик бериледи. Ол а артыкъ иги тюйюлдю, адам тохтай билмей, ичгенлей турлукъду»,-дегенди ол.

Болсада Финансла министерство тамамлагъан жумушла  жалгъан аракъыны тохтатыугъа бурулгъанларын айтады.  «Биз акъыл этгенден, лицензиясы болмагъан продукция сатыллыкъ тюйюлдю. Ол а халкъны саулугъун сакълау концепциягъа келишеди. Жалгъан аракъы адамны саулугъуна уллу заран салады, лицензиясы болгъан ичгиден эсе»,-дегенди Финансла министерствону таможня политика эм ичги рынокну бир низамгъа келтириу жаны бла департаментини башчысыны орунбасары   Александр  Коробутов. 

Сиз а къалай сунасыз, аракъыны онлайн халда сатыу-алыу ичгичиликни азайтыугъа себеплик этерикмиди?