Кёгетлени эм игилерине сертификат шагъатлыкъ этерикди

Россейде «жашил» кёгетлени сертификациясы башланнганды, деп билдиргендиле Роскачестводан. Ведомствону сайтында айтылгъаннга кёре, бу иш бла «Роскачество-Органик» деген бёлюм кюреширикди. Ол берген къагъыт а кёгет эм иги болгъанына шагъатлыкъ этерикди.

Эсге сала айтсакъ, быйыл биринчи мартда «Продукция и продовольствие с улучшенными характеристиками. Овощи тепличные. Общие технические требования и правила производства» деген стандарт (ГОСТ Р 70575-2022) кюч алгъанды. Ол кеси да «Экологиялы белги» деген техникалы комитетни чеклеринде жарашдырылгъанды.

Бу ГОСТ «жашил» кёгетлени ёсдюрюуге излемлени тохташдырады. Сёз анда пестицидлени, уулу элементлени, радионуклидлени эмда нитратланы юслеринден барады, ала шёндюгю мардалагъа къалай келишгенлерин кёргюзтеди. Жангы стандарт кёгетледе быллай затланы мардасына чек алады. 

Сертификацияны ётген кёгетлеге «Жашил эталон» деген белги саладыла. Аны юсюнден информация уа Россей Федерацияны Эл мюлк министерствосуну тийишли реестрине тюшерикди.

Быллай сертификат къоллу болургъа сюйгенледен Роскачествогъа бир ненча заявка берилгенди. Ол а «жашил» кёгетлеге, къуру къыралны угъай, продукция чыгъарыучуланы жанындан да сейир уллу болгъаныны белгисиди.