Юйден ишлеген игиди, алай кемчиликле да бардыла

Коронавирус ауруу жайылгъан кезиуде организацияла дистанциялы амалгъа кёчюп,   юйден ишлерге онг болгъанды. Урунууну бу амалы кесини хайырлылыгъын кёргюзтгенди, алай бла уа бюгюн, ауруу тохтагъандан сора,  кёпле юйлеринден ишлерге угъай демейдиле.   

 Алай дистанциялы амал бла ишни бир юйде жашагъан бир ненча адам сайласала уа, къалай боллукъду? Бу статьяда ишчи низамны хайырлы къурауну амалларыны юсюнден айтаргъа сюебиз.

Кемчиликле  бла хайыр

Биринчиден, хайырны юсюнден айтайыкъ. Бек алгъа юйюр заманны асламын бирге  ётдюрлюкдю, ол а байламлыкъланы кючлерге болушурукъду. Андан сора да жолгъа къоранчла этилмей, ахча аялады. Ишде чырмаулагъа тюбесегиз а, жууукъ адам бла оноулашыргъа, андан болушлукъ алыргъа боллукъду.

Болсада кемчиликле да аз тюйюлдюле. Иш кереклисича къуралмаса, даулашла, ангыламаулукъла чыгъадыла. Дагъыда ишден бёлюнюп, заманны тас этерге, салыннган борчланы толтурмай къояргъа къоркъуу да уллуду.   

Аны себепли юйден ишлеген кезиуде низамны тохташдырыу артыкъда магъаналыды. Биринчиден, юйден ишлегенде, бир бирге чырмамазгъа, эсни бёлдюрмезге сёз беригиз. Андан сора да, ишчи жерни юлеширге керекди – онг болса, башха отоулада олтуругъуз. Фатар биротоулу эсе уа, хар кимни да кесини столу болургъа тийишлиди. Дагъыда бир бирни кёрмезча бёлме болса да игиди. Бютюнда биригизни иши телефон бла байламлы эсе,  ол артыкъда болушады.

Ишчи заман

Сёлешип, дауур этип, жырлагъа тынгылап, сауутланы жуууп, ит неда киштик бла ойнап, башханы ишинден бёлмегиз.  

Дагъыда ишчи кюнню тизмесин къурагъыз. Бир бирге чырмау болмаз ючюн, урунуп бир заманда башларгъа эм бошаргъа боллукъду. Аллай онг жокъ эсе уа,   кюнню ичинде хар биригизни да къаллай ишигиз болгъанын алгъадан билдиригиз.    Дагъыда  юй жумушланы  ким эм не заманда тамамларыгъын  белгилеген да хайырлыды.

Къуруда юйде  тургъан, бир бирге тёзген  къыйынды, аны ючюн кафеге барып, андан ишлерге да боллукъду. Бирге  угъай, хар биригиз энчи. Жууукъ адамынгдан солургъа да керекди.

Алимле айтханларыча, бирде жууукъ адамынг башхаладан эсе къаты  ачыуландырады, къанынгы къыздырады.  Юйюр байламлыкъла бузулмаз ючюн, даулашны терк окъуна тохтарыкъ сёзню белгилегиз. Къыза башлагъанда, аны айтханлай, эки жаны да тохтап, тынгылап къалырча. Ол кезиуде юйюрню сакъларгъа онг боллукъду.

Сау кюнню, ыйыкъны, айны бирге тургъан, сёзсюз, къыйынды, уллу сынауду. Аны ючюн   нёгерлеригиз бла тюбеширге, спорт, башха сейир затла  бла кюреширге тийишлиди – хар ким да кеси. Ол кезиуде бир бирден арымай, арагъызда байламлыкъланы кючлериксиз.