«Бир бирни эшите, тынгылай билиу, ышаныулукъ – насыпха жол ачадыла»

Инсанны жашауунда эм багъалы юйюрюдю, дейди «Эльбрус» спорт школну грек-рим тутушуудан тренери Гюлюйланы Солтан. Гёжефлени хазырлагъанындан тышында, ол «Таулагъа чыгъыу жаны бла хазырлау «Терскъол» ара» учрежденияны водитель-инструкторуду, аскерчилени снегоходлада бла квадроциклледе жюрюрге юйретеди.

Юйюр Солтан тёрт жыл мындан алгъа Лелюкаланы Алима бла къурагъанды. Кеси Алим Иссаевични бла Мая Жираслановнаны кёп сабийли юйюрлеринде туугъанды. Школдан сора Къабарты-Малкъар къырал университетни Инженер-техника факультетин тауусханды. Алай урунууда уа башха жолну сайлагъанды – сабийлени физкультура эм спорт жаны бла юйретиу. Аны ючюн университетни Квалификацияны ёсдюрюу институтунда хазырланыу курсланы ётгенди. Аны бу оноуу сейир да тюйюлдю – гитчелигинден бери спорт бла кюрешгенди, тюрлю-тюрлю эришиуледе алчы да болгъанды. Бусагъатда уа, сабийлеге жарау этдире, саулукълу, жетишимли жаш тёлюню ёсдюрюрге итинеди. Спортчулары да тренерлерин къууандырадыла – район, республикалы, регионла аралы, округ даражалы турнирледе саугъа жерлеге дайым чыгъадыла. Былтырдан бери Солтан Элбрус элни жер-жерли самоуправление советини депутатыды.

Юй бийчеси Алима да Лелюкаланы Сафар Магомедовични бла Мадина Сарбиевнаны кёп сабийли юйюрлеринде ёсгенди. Юч жыл мындан алгъа университетни Информация технологияла эм экономика колледжин тауусханды, «Компьютер системалада программирование» жаны бла усталыкъ алгъанды. Бусагъатда Элбрус регион колледжде «Школгъа дери билим бериу» усталыкъгъа окъуй турады. 

 Солтан бла Алима оюм этгенлерича, юйюр жашауда бир бирни ангылай билиу уллу жерни аладыла. Бир бирни эшите, тынгылай билиу, ышаныулукъ – насыпха жол ачадыла. Сабийле Алия  бла Хадиджа туугъанлы уа аланы жашаулары бютюн уллу къууанчдан толгъанды. Кеслери айтханларыча, юйюрлери толу болуп, айныргъа, алгъа барыргъа, балалары насыплы болурча кюреширге итиниулюк келгенди. Жаш ата бла анагъа къызларыны ёсгенлерине къарагъан уллу насыпды.

Гюлюйланы юйюрлеринде миллетни адет-тёресин тутадыла, кертичиликни, огъурлулукъну, жанында адамгъа къайгъырыулукъну багъалайдыла, таматалагъа, тёгерекдеги инсанлагъа, урунуугъа хурмет этедиле. Бош заманларын ала сабийлери бла ётдюрюрге сюедиле. Кеслерини ата-аналарын да унутмайдыла, юй жумушлада болушадыла.

Солтан бла Алима «Жылны юйюрю» деген битеуроссей эришиуню регион кезиуюне къатышхандыла, анда «Жаш юйюр» номинацияда хорлагъандыла.