МФЦ-да унутхан къагъытларыгъызны алыгъыз

Къабарты-Малкъарда МФЦ-лада унутулуп къалгъан 90 мингден артыкъ документ бюгюнлюкде Роскадастрны республикада бёлюмюню архивинде сакъланадыла. Адамла къагъытларын 45 кюнню ичинде алмай къойсала МФЦ-дан, аланы ызы бла ма ары жибередиле. Ведомствону келечиси Светлана Тамазова билдиргенича, мында унутулуп къалгъан документлени къыралны къайсы шахарында сюйсегиз да алыргъа жарайды.

«Адам къагъытларын аз тюрлю сылтау бла алмай къоюучуду, - дейди ол. - Бирле МФЦ-ны специалисти телефон бла сёлешгенде жеринде болмай къаладыла. Башхала уа унутадыла, ауруп, заманларын оздурадыла неда алагъа бир жары кетерге тюшеди. Сылтау къаллай да болсун, башхасы жокъду, алай МФЦ-да унутулгъан документлени уа алыргъа керекди».

Роскадастрны архивинде гражданлагъа магъаналы болгъан сатыу-алыу, саугъагъа неда ёнкючге бериу келишимле, ырысхыны башхагъа къойгъанына шагъатлыкъ къагъытла сакъланадыла. Сёз ючюн, адам кесини юсюнден кетерип, башханы иелигине кёчюрген мюлк ючюн налог тёле деп къагъыт келсе, аны къолунда сатыу-алыу келишими болургъа керекди. Ансыз ол мюлкню иеси башха адам болгъанын ангылатхан бек къыйын боллукъду. Жеринден тепдирилмеген мюлкню Бир къырал реестринден а тийишли информацияны алгъан алай женгил тюйюлдю - ол мюлкню керти иесини эркинлигин излейди.

«Жашауда аз тюрлю зат болмайды. Сиз къагъытларыгъызны МФЦ-да унутуп кетген эсегиз, Роскадастрны къатыгъызда бёлюмлеринден бирине барып, аны айтыгъыз эмда заявление жазыгъыз. Ала аны юсюнден бизге билдирликдиле, биз а документлени алагъа жиберликбиз. Къагъытларын унутхан инсан аны ючюн абери тёлерик тюйюлдю», - дегенди Светлана Тамазова.