Жылыу бла жалчытыуда бир оператор боллукъду

«Газпром межрегионгаз» компанияны башчысыны орунбасары Юрий Пахомовский бу кюнледе КъМР-ни Правительствосуну Председатели Мусукланы Алий бла тюбешгенди. Ала оноу этгенлерине кёре бизни республикада жылыу бла жалчытыу ишни тамамлагъан бир оператор (ЕОТ) 2024 жылда ишлеп башларыкъды. Ары дери уа регионну властьлары Нальчикде, Элбрус эмда Май районлада объектлени тийишдириу бла кюреширикдиле.

«Келир жыл Къабарты-Малкъарда Бир оператор ишлеп башлагъаны бла эмда жылыугъа бла исси суугъа жангы тарифле тохташдырылгъаны бла, республика, федерал ара да къошулуп, газ ючюн тёлеулерин толусунлай берип тебирерге онг табарыкъды. Иш алай къуралгъаны себепли жылыу бла жалчытхан организацияланы борчларын да кетерирге онг боллукъду», - дегенди Юрий Пахомовский.