Эсеплени чыгъарып, жууукъ кезиуге жумушланы белгилегендиле

«Къарачай-малкъар халкъны маданият эм жарыкъландырыу жаны бла совети» жамауат организация къурап бардырылгъан «Нартланы хазнасы» деген  сурат кёрмючню жабылыуу Къарачай шахарда ётгенди. Жайда Нарсана шахарда кёргюзтюлгенден сора, ол Къарачай-Черкес Республиканы къырал университетине кёчген эди. Сау айны аны бла бу шахарда эм къоншу элледе жашагъанла шагъырей болгъандыла.

Эсигизге салайыкъ, бери жетгинчи ол Черкесскде, Нальчикде, Къашхатауда эм Нарсана шахарда айла бла кёргюзтюлюп, уллуну-гитчени да сейирлерин къозгъагъанды. Бу шартны регионланы музейлерини специалистлери энчи чертип айта эдиле. Юлгюге КъЧГУ-ну Маданият эм искусство институтуну директоруну къуллугъун толтургъан Наталья Кириченкону сёзлерин келтирирчады. Ол бу кёрмюч аланы студентлерине аламат саугъа болгъанын чертгенди.

- Ала, преподавательлерибиз бла бирге, 2022 жылда Нарсана шахарда Совет къурап бардырылгъан  семинарда болуп, къарачай-малкъар халкъны нарт таурухларыны жигитлерини сыфатлары къаллайла болгъанларына тюшюнюп, ызы бла иги кесек сурат ишлегендиле. Дагъыда кёрмючге сабий садладан башлап, абадан тёлюню келечилери да келе эдиле. Черкесскден келгенле окъуна болгъандыла, - деп билдиргенди ол.

Ызы бла уа университетни фойесинде кёрмючню къууанчлы жабылыуу болгъанды. Анга КъЧГУ-ну ректору Ёзденланы Таусолтан, Къарачай-малкъар халкъны маданият эм жарыкъландырыу жаны бла советни таматасы Жабелланы Лидия, Элбрус районну маданият управлениясыны  башчысы Толгъурланы Жаннет, профессор Бёзюланы Руслан, КъЧР-ни Суратчыларыны союзуну таматасы Аталаны Халис, суратчыларыбызны бла къолдан усталарыбызны къаууму да къатышхандыла.

- Бу кёрмюч миллет хазнабызны багъанасыды деп, таукел айталлыкъма. Кёп замандан бери халкъыбызда быллай иш бардырылмагъанды. Ма бу ишни магъанасы хар малкъарлыгъа бла къарачайлыгъа да бек уллуду. Адабиятыбызны бла маданиятыбызны бийик даражагъа чыгъарады, - деп чертгенди къонакъбай Таусолтан Аубекирович.

Ызы бла сёз Жабелланы Лидиягъа берилген эди. Ол, бу ишни бардырыугъа къыйын салгъан хар адамгъа да ыразылыгъын билдирип, белгили фольклорчула Къудайланы Мухтарны бла Таумырзаланы Далхатны къол жазмаларындан жарашдырылгъан эм кёп болмай басмадан чыкъгъан китапларын саугъагъа бергенди.

- Миллет хазнабызны алтын кюбюрчегидиле была. Бу китапланы маданият эм билим бериу учрежданияларыбызгъа юлеширикбиз эки республикада да. Быланы уа университетни библиотекасына беребиз, -деп, аланы Ёзден улуна саугъалагъанды.

Дагъыда аллай китаплагъа бу башламчылыкъда билеклик этген адамла бла жамауат организацияла да тийишли болгъандыла.

Ызы бла къарачай-малкъар назмучуланы тизгинлерин университетни студентлери Къобанланы Джамиля бла Каракетланы Тамара окъугъандыла. Белгили жырчы Ёзденланы Кямал а къарачай-малкъар халкъ жырланы эжиу бла айтханды.

Андан сора битеу къонакъла университетни китапханасына кёчюп, кёрмючню эсеплерин чыгъаргъандыла эм мындан ары къаллай ишле тамамларгъа кереклисин белгилегендиле.