Аны къол ызы ариулукъгъа келтиреди

Бюгюнлюкде дизайнер, стилист деген усталыкъла энчи жерни аладыла.  Алай ол ишлеге юйреннгенден сора да, адамны хунери болургъа да кереклиси жашырын тюйюлдю. Нек дегенде ол да искусствону бир тюрлюсюдю. Бизни бюгюннгю жигитибиз Яникойчу жаш Адрайланы Элдар бизни республикада угъай, Москвада да белгили профессионал-стилистди. Бюгюнлюкде ол Рублёвкада «Beauty seasons» деген салонда ишлейди. Бизни къыралда аллай профессионал студияла уа жаланда ючдюле. 

Жашны бу ишге итиниулюгю сабийлигинден бери да болгъанды. Алай анга юйюндегиле уллу эс бурмагъандыла. Школдан сора КъМКъУ-ну малкъар тил бла адабият факультетин бошагъанды. Анасы Воронежде ишлегенинде анга себеплик этерге ызы бла ары барады. Ол кезиуде анда парикмахер курслагъа жюрюп башлайды. Алай бла жашны жашауунда ол усталыкъ энчи жерни алады.

 Бу иш бир-бирлеге къыйын кёрюннгенликге, клиент чачын къалай ишлерге, жыяргъа сюйгенин ангыласанг, къол усталыгъынга къууаннган этесе, дейди жаш кеси уа. Курслада эр кишилени, тиширыуланы да чачларын къыркъыргъа, ариу этерге да юйреннгени себепли, биринчи клиентлерин да эсинде тутханын айтады ол бизге. «Бек биринчи причёсканы окъуу арада чачлары агъаргъан тиширыугъа этген эдим. Аллай чач бла ишлеген къыйын болгъаны ючюн эки-юч сагъат кюреширге тюшгенди. Ол заманнга ол къалкъып да уяннган эди. Алай ахырында этген ишиме ыразы болуп, бир ненча айдан а биягъы къайтып келгенди. Эр кишилени араларында уа биринчи клиентим ахыргъы да болуп къалгъан эди», - дейди Элдар.

Бир талай замандан а Нальчикге къайтып, мында да ол усталыгъына кёре урунады. Тиширыуланы чачларын ишлеген анга тынчыракъ болгъанын белгилейди ушакъ нёгерим. Аны керти да бу усталыкъгъа хунери болгъанын ангылап, къол ызын жаратып, анга келирге сюйгенлени саны ёсгенлей барады. Бир кезиуде ол КъМР-де белгили стилистлени санына кирип, «Мадо» деген салонда ишлеп тургъанды. Телевиденияда бардырылгъан стиль бла байламлы бериуледе мастер-классла да кёргюзтгенди.

Бизни республикада да аллай затлагъа уллу эс бурулуп башлагъанлыкъгъа, Москвада усталыгъын айнытыргъа, сейир затлагъа юйренирге иги онгу болгъаны ючюн, Адрай улу эки жыл мындан алгъа ара шахаргъа кёчгенди. Биринчи заманда Нальчикден клиенткасы болушуп, бир салонда ишлеп, курслада да билимин ёсдюрюп тургъанды. Бир жыл озгъанда сора уа, аны Интернетде салгъан ишлерин жаратып, огъарыда сагъынылгъан Рублёвкада профессионал студиягъа чакъыргъандыла.

Аны бла чекленип къалмагъанлай, Элдар мындан ары да усталыгъын ёсдюргенлей турады. Къысха заманда уа Дизайнни Британ школасында окъургъа умутлуду. Андан сора жаш, талай замандан туугъан жерине къайтып, мында да стилист усталыкъны айнытхан окъуу учреждение ачаргъа умутлуду.

Дагъыда ол Нальчикде белгили визажист Анастасия Бондарьны «VIVID CONVERSION» академиясында энчи мастер-класс кёргюзтгенди. Ол ызда ишлеген жаш адамлагъа бизде хазна айнымагъан технологияланы юслеринден айтып, кёп магъаналы затлагъа юйретгенди. Мындан арысында да бери келип, бу усталыкъ бла кюреширге сюйгенлеге дерсле бере турургъа умутлуду. Жууукъ заманда Элдарны битеу ахшы муратлары жашаугъа кийирилип, бизни иши бла къууандырыр деп ийнанабыз. Не десек да, ариулукъ къутхарады бу дунияны къарангылыкъдан.