Тарыхны жангы китаплагъа кёре

Биринчи сентябрьден башлап Къабарты-Малкъарны окъуучулары Ата журтубузну тарыхын жангы китапла бла окъурукъдула. Тамата класслагъа тарыхдан китап къырал даражасы болгъан бирикдирилген дерсликге саналлыкъды. Аны жазгъанла – Россейни алгъын маданият министри Владимир Мединский, МГИМО-ну ректору Анатолий Торкунов, РАН-ны битеулю тарыхны институтуну башчысы Александр Чубарьян.

Быйыл жангы китапла бла тамата класслада окъугъанла хайырланып башларыкъдыла, ала орта класслагъа да хазырлана турадыла, экинчи жыл программагъа кирликдиле.

Жангы китаплада озгъан ёмюрню жетмишинчи, сексенинчи, токъсанынчы, эки мингинчи жыллагъа аталгъан материал жаппа–жангыды, 2014 жылдан бери жашауубузну ачыкълагъан бёлюмде СВО-ну юсюнден да айтылады. Жангы окъуу китапла быладыла: «Россейни тарыхы» (онунчу класс), «Битеудуния тарыхы» (онунчу класс), «Россейни тарыхы» (онбиринчи класс), «Битеудуния тарыхы» (онбиринчи класс). Китапланы жазгъанла битеудуния эм бизни Ата журтубузну тарыхлары къалай байламлы болгъанларын кёргюзтгендиле.

Битеудуния тарыхны китабында Къытайны, Индияны, Японияны юсюнден кёп зат билирге боллукъду. Дагъыда Африканы юсюнден биринчи кере жазылгъанын чертирге керекди. Латин Американы юсюнден да кёп айтылады. Дунияда маданият эм илму къалай айныгъанлары да кёргюзтюледи.   

Жангы китаплагъа кёре, хар затны юсюнден школчу кесини оюмун айтыргъа керекди, ол башхаланыкъыладан эсе энчи болургъа боллугъу чертиледи. Алай бла школчула сагъыш этерге, болгъан затланы тинтирге юйренедиле. Дерслени чеклеринден чыгъып, хар сабий къошакъ халда литератураны кеси аллына окъургъа керекди. 

Бусагъатда адабиятдан, обществознаниядан да жангы китапла хазырлана турадыла.