Сексен жылдан сора атасыны майдалын жашы аллыкъдыГазаланы Къарайны жашы Магомет Уллу Ата журт урушну кезиуюнде «Ленинградны къоруулагъаны ючюн» майдалгъа тийишли болгъан эди. Алай анга шагъатлыкъ этген къагъыт а берилмей къалгъан эди. 80 жылгъа жууукъ заман озгъандан сора майдалны удостоверениясы Магометни жашына берилликди. «КъМР-ни Эсгериу китабында жазылгъаныча, Уллу Ата журт урушдан Газаладан онсегиз адам къайтмай къалгъанды. Бизни тинтиу ишибиз а Магометге жораланады», – деп жазадыла излеу-тинтиу ишлени дайым бардырып тургъан Ахмед бла Дина Нахушевла. Ала тапхан шартлагъа кёре, Газа улу 1901 жылда Шкантыда (бусагъатда Огъары Малкъар) туугъанды. Аны юйдегиси Хуболланы Хажибекирни къызы Марзият эди. Магомет фронтха кетгинчи аланы беш сабийлери болгъанды: Лейля, Сакинат, Ибрагим, Мурадин эмда Буллах. Газаланы Магомет Уллу Ата журт урушха дери колхозда малчы болуп уруннганды. 1941 жылда уруш башланнганда уа, аны Черек районну аскер комиссариатыны чакъырыуу бла фронтха жибередиле. 268-чи жаяу дивизияны ёлген эмда белгисиз тас болгъан аскерчилерини юслеринден 1943 жылны 26 мартындан 11674-чю номерли билдириуге кёре, 268-чи жаяу дивизияны 214-чю энчи пулемёт батальонуну къызыл аскерчиси Газаланы Магомет 1943 жылны 12 январында Ленинград областьда белгисиз тас болгъанды (тизмеде 19-чуду). Магометни тукъуму жазылгъан тизмеде аны юй бийчесини да аты барды - Газаланы Марзият. 268-чи жаяу дивизияны 214-чю энчи пулемёт батальонуну командири 1943 жылны 14 мартында Магометни юй бийчеси Марзиятны аты бла Черек районнга къагъыт жибереди. Анда баш иесини ёлгенини юсюнден билдириле эди. Анга кёре Газаланы Магомет Ленинград областьны Всеволжск районуну Дубровка элинде, «Часовня» эсгертмеден узакъ бармай асыралгъанды. «Магометни жашын - Газаланы Буллахны - биз Хасанияда тапханбыз. Ол ишде бизге Газаланы Байдуллахны жашы Масхут уллу себеплик этгенди. Буллахны аты бла биз тийишли документле жыйышдырып, РФ-ни Къоруулау министерствосуну кадрла жаны бла управлениясына письмо жазгъанбыз. Анда Газаланы Магометни этген жигитлиги ючюн берилген майдалгъа шагъатлыкъ этген къагъытны берирлерин тилегенбиз. Бизни ол тилегибиз къабыл кёрюлгенди. Уллу Ата журт урушну кезиуюнде майдалгъа неда орденнге тийишли болуп, берилмей къалгъан саугъаланы излеулерибизден бири аны бла бошалгъанды. Магометни жашы Буллахгъа «Ленинградны къоруулагъаны ючюн» майдалны шагъатлыкъ къагъыты жууукъ заманда берилликди», – деп жазгъандыла Ахмед бла Дина Нахушевла.
Поделиться:
Читать также:
26.04.2024 - 16:40 →
Элни жашаууна къууат берген
19.04.2024 - 12:45 →
Огъурлулукъгъа ийнаныуну тас этмей
17.04.2024 - 14:39 →
Ара межгит – ариу жерлерибизден бири
16.04.2024 - 09:26 →
«Ишим халкъгъа хайыр келтирсе сюеме»
15.04.2024 - 10:22 →
«Чепкенлерибизни жаратханла кёп болуп, аланы терк сатып алгъандыла»
|