Жолоучуланы болушлукъчулары

Май айда Пятигорск шахарда турист слёт ётген эди. Анга Минги тауну этегинде жашагъан  гид Алена Гирина да къатышхан эди. Аны чеклеринде «Жаш экскурсовод» деген проектни юсюнден да сёз баргъанды. 

– Бу аламат башламчылыкъны  жашауда бардырыу бек магъаналыды. Анга къатышыр онглары 8–17–жыллыкъланы  барды. Бюгюнлюкде биз аны жашауда бардырыугъа энчи эс бёлебиз, – деп билдиргенди Алена Сергеевна. 

Проектни ишин а аны бла бирге Элбрус элден Хаджиланы Назиля бла Джамиля бардырадыла. Ала бу тийреге солургъа келген туристлени таулуланы миллет тепсеулери, къол чыгъармачылыкълары, хазналары, аш-суу байлыкълары бла шагъырей этгенлей турадыла. Ма бу кюнледе да ала Санкт–Петербургдан келгенледе болуп, хычинле къалай этилгенлерин кёргюзтгендиле. Къонакъла Назиля эм Джамиля бла бирге кеслери да сюйгендиле бу жумушха къатышыргъа. 

Алёна Гиринаны оюмуна кёре, сабийлени быллай жумушха къатышдырыу бек магъаналыды. 

– Ала абаданлача ётюрюк айта билмейдиле. Тазадыла. Хар нени да болгъаныча ачыкълайдыла. Ма бу къызчыкъла да проектни тутуругъудула деп айталлыкъма. Россейни тамблагъы кюню ма быллай жаш тёлюдю. Аны ариу халли, таза ниетли ёсдюрюу бизни къолубуздады, – деп чертгенди ол. 

«Жаш экскурсовод» деген проект алыкъа  жаланда бизни регионда бардырылгъанын белгилерчады.