Тиш пастаны сайлагъан алай тынч иш тюйюлдю

Бюгюнлюкде тюкенледе тиш пасталаны бек кёп тюрлюлерин кёрюрге боллукъду.Болсада аланы хар бири да тишлеригизге жарарыкъды дерге жарамаз. Къайсы жыл санда да адамны  ауузуна энчи къарау изленеди, сёзсюз, тишлеге багъыучуну айтханын да эсге алыргъа керекди.

Кариесге къажау кюрешгенле фтор, фосфор неда кальций бирге къошулуп жарашдырылгъан пасталадыла. Тири  фтор тишлени кислоталагъа къажау кюрешлерин кючлейди, эмальда минералланы кёбейтеди, бактерияланы ишлерин къарыусузландырады - кариес чыкъмазча этеди.

Фторлары болгъан пастала кариесден профилактикача жюрютюледиле, эмальны кючлейдиле, бюгюнлюкде  ала эм белгили ингредиентдиле.

Пастада фтор  къаллай бир кёп эсе, ол паста кариесге къажау кюрешде аллай бирге къыйматлыды. Башха затла, сёз ючюн, кальцийлери, фосфатлары неда ксилитлери болгъан пастала башха пасталагъа къошакъ болушлукъчулагъа хайырланылыргъа  боллукъдула.

Болсада: пастада фтор асыры кёп болса, сабийлени сют тишлерине заран келтиреди - флюороз аурууну (эмальда акъ тамгъаланы) чыгъарыргъа боллукъду. Сабийлеге тиш пастаны сайлай туруп, энчи сабий пастаны алыргъа керекди, анда  фторид азыракъды.

Тиш этлени сакълагъанла

Гингивитге эм пародонтитге къажау профилактикача хайырланыладыла. Тиш этлени къанауларын азайтадыла, аурууну, асытыуну селейтедиле, воспаленияны кетередиле. Аланы составларында биология жаны бла тири веществола бардыла: ферментле, витаминле, дарман хансла, антисептикле (триколзан эм хлоргексидин). Воспалениягъа къажау пастала  диабетиклеге (тишлери бек саргъайыучулагъа)  керекдиле. Ала сабийден жюклю тиширыулагъа да борчлу халда керекдиле.

Триклозанны мурдорунда жарашдырылгъан пасталаны - сополимерле бактериялагъа къажау тиш этлени къанауларын эм кёпчюулерин кетередиле.

Болсада: хлоргексидинлери болгъан пастала ауузда дисбактериозну чыгъарыргъа боллукъдула, тишлени бетлерин бузадыла, ашны татыуун тюрлендиредиле.

Энди ана боллукъ тиширыулагъа да жарамайды аллай пасталаны хайырланыргъа: ол анала, тиш этлени воспаленияларын кетерир ючюн, башха затланы табаргъа керекдиле.

Ташланы кетергенле

Аллай затланы тютюнчюлени тишлерин ариулауда хайырланадыла. Калийни, натрийни, пирофосфатлары, цинкни  цитраты болгъан пастала тишни эмалинда бояучу затла олтурмазча, таш къуралмазча этедиле. Андан сора да, ол мурат бла бактериялагъа къажау веществоланы хайырланыргъа  боллукъду,  нек дегенде тиш таш пигментацияды, ашарыкъладан чыгъып жабышады тишлеге.

Болсада: тиш таш къуралгъан эсе, стоматологга барыргъа керекди, тишни ультразвук бла ариулатмай  жарарыкъ тюйюлдю, андан сора уа сыйдамларгъа керекди.

Чыдамсызлыкъгъа къажау

Быллай тишлени  жууучу пасталагъа эмальны бузмазгъа себеплик этген компонентле къошуладыла, ала тишни  тыш къабугъу  бузулмай турууун жалчытадыла, аурутмай турурча да этедиле. Сёз ючюн, гидроксиапатит тишни эмалинда жарылгъан жерчиклерин толтурады. Калийни нитраты. Андан сора да, тиш пасталада стронцийни фториди,  стронцийни хлориди, фторидлени ионлары, кальцийни хлоридлери  бардыла.

Бу затла барысы да тишни тышында эмальны артыкъ сезимлиликлерин кетередиле.

Болсада: къыйматлылыкъ не къадар иги болур ючюн, бек сезимли тишлеге деп жарашдырылгъан пастаны хайырланыргъа керекди, ол не къадар жумушакъ болса игиди. Андан сора да, пастаны воспалениягъа къажау багъыуда хайырланылгъан тюрлюсю болса игиди.

Акълаучула

Быллай пастала эки тюрлюге юлешинедиле: зыбырыракъла эм тири химиялы веществолары болгъанла. Пасталаны биринчи къаууму тишлени тышларын иги ариулайдыла,  алай ала тишни эмалын бузаргъа да боллукъдула. Алай  бла уа тишле бютюнда бек саргъаладыла, бузулгъан  эмальны тюбюнде сары  дентин кёрюнюрюкдю. Ол себепден а дайым хайырланылгъан пасталаны бек зыбырларын алмагъыз.

Тири химия веществолары болгъан пасталада кючлю  окислительле бардыла, ала тишлеге тийгенде, кислородну эркин  радикаллары къураладыла, ала уа эмальны ичине киредиле,  бизни тишлерибизни сары неда боз бетли этедиле. Пигментле тишлени къаматсала, бетлери бузулады, тишле уа агъарадыла.

Акълагъан пастаны сайлай туруп, жаланда стоматолог  болушургъа боллукъду, ауузну, эмальны эм тиш этлени болумларына жаланда ол багъа бичаллыкъды.

Болсада: сизни тишлеригиз асыры сезимлиле эселе, акълаучу пасталаны хайырланмасагъыз игиди. Ол   пастала сезимлиликни кючлерге боллукъдула.

Билген адамны юйретиую

Игорь Лемберг, медицина илмуланы кандидаты, Сolgate Total-ны эксперти:

- Бюгюнлюкде тиш пастала кёпдюле. Аладан бек къыйматлылагъа триклозанны-сополимерни мурдорунда жарашдырылгъанла саналадыла: ала бактериялагъа эм воспалениялагъа къажау багъыуда хайырланыладыла.

Быллай пастала бир жолгъа кёп тюрлю проблемаланы тамамларгъа болушадыла - кариесден, тишлеге жабышхан затладан, аууздан келген ийисден, бактерияланы жаратылыуларындан, эмальны къоруулаудан, тиш этлени къанауларындан, эмальны жукъарыуундан, асыры сезимлиликден къутултадыла. Бу тюрлю пастала тишлени саулукъларын сакълауда эм къыйматлы дарманладыла.