«Биз анга Буба дегенбиз»

Чегем шахардан Аккайланы Алий бизге къарт анасыны анасы Геграланы Токашны къызы Сакинатны  уллу  жюрек жылыу бла эсгерип жазгъанды.

«Биз анга Буба дегенбиз. Аны эсгериулерине тынгыларгъа бек сюйгенме. Артыкъда кёчгюнчюлюкде жашауларыны юсюнден кёп кере айтханды. Не сейир, аны хапары ауур тюйюл эди. Не бет жылыуун, не халаллыгъын, не огъурлулугъун тас этмегенди ол кюйсюзлюкде.

Сюргюннге Буба Акъ-Топуракъда тюбегенди. 8 мартны эрттенлиги сууукъ эди. Машиналагъа жетер ючюн тёшден тюшерге керек болгъанды. Бубаны уа баш иеси аягъындан къыяулу эди. Ол себепден аны урушха да алмагъандыла. Саусуз, къарт къайын анасын аркъасына кётюрюп, къоюнунда экижыллыкъ къызчыгъы, юч жашы, къыяулу баш иеси тёшден тюшюп, азап жолгъа атландыла. Жолда къайын анасы ёледи.

Ала Къазахстаннга Мерге элге тюшедиле. Ачлыкъ, жолну узакълыгъы, ауруула Бубаны юч жашын, баш иесин да аямадыла. Къолунда къызчыгъы бла жангызлай къалады. Къадаргъа, кюйсюзлюкге бойсунмай, кёп таулу аналача, жашау этерге кюрешеди.  Къызчыгъын къояргъа адам тапмай, биргесине алып баргъанды чюгюндюр бахчагъа. Аны этеклерине чулгъап ишлегенди.

Дагъыда бир шарт къуру да эсиме келеди.  Буба саугъала юлеширге бек сюйгенди. Келген сабийге берир заты болмаса, бек амалсыз болгъанды. Пенсиясын алгъанлай, жумуртхалача этилген конфетле алдырып, аланы юлешгенди. «Киндер сюрпризни» уа энди чыкъгъан заманы. Ол алай ёлген жашчыгъы ючюн этгенди. Жагъафарчыкъ къыйын ауругъанда, жумуртха тилегенди. Юйде болмагъаны ючюн Буба къоншулагъа чабады. Азмы, кёпмю айланды юй сайын, тапханды. Алай кеч эди… Жашчыгъы ёлгюнчю жетдиралмагъанды. Эштада, бизге жумуртхагъа ушагъан конфетлени берип, жюрегин чёкдюре болур эди.

Бизни барыбызны да сейирге къалдыргъан а Бубаны 8 мартны жууукълашханын сезип къойгъаны. Сууукъ къыш узакъгъа созулса да, жаз башыны келгенин бир шарты да болмай тургъанлай: «Келе тура болур дейме ол кюн – бизни кёчюрген кюн»,-дер эди. Биз да, туудукъла, алгъадан окъуна сакълагъанбыз 8 мартны – бизни къарт анабызны туугъан кюнюн. Барыбыз да тёгерегине жыйылгъанбыз. Алай Буба бизни ол кюн бушуу кюнледен хапарла бла мудахландырмагъанды. Кёрген ачыулары, ауур ишде алгъан къыйын аурууу да аны огъурсузландырмагъандыла. Нюрлю сыфаты, ариу  сёзлери бизни жюреклерибизни жарытханлай турадыла.

Миллетибизге жетген къыйынлыкъланы бир киши да сынамасын. Биз а, эндиги жаш тёлю, аны эсде тута, къарт аталарыбыздан бла аналарыбыздан тёзюмлюкге, кертичиликге, таукелликге, жашаргъа итиниулюкге юйренирге керекбиз».