Ал жанында - миллет проектлени бла къырал программаланы толтуруу

КъМР-ни Башчысы Казбек Коков районланы бла шахар округланы администрацияларыны таматалары бла ыйыкъ сайын бардырылыучу тёрели кенгешни ётдюргенди. Сюзюуге КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков да къатышхандыла, деп билдиргендиле КъМР-ни Башчысыны бла Правительствосуну пресс-службасындан. 

Жыйылыуда муниципалитетде миллет проектлени бла къырал программаланы толтуруу не халда болгъанына къаралгъанды. Ол  санда кёп къатлы юйлени арбазларын тапландырыуну, маданият мекямланы, мектепледе спорт залланы жангыртыуну, къоркъуулу юйледе жашагъанланы тынгылы журтлагъа кёчюрюуню, жолланы бла коммунал ызланы тап халгъа келтириуню юслеринден сёлешиннгенди. Белгиленнгенича, сагъынылгъан мекямланы жартысы чакълы биринде ремонт ишле бошалгъандыла, къалгъанлада жангыртыу  ишлени болжалларына бла тынгылылыкъларына контроль этилгенлей турады. 

Кенгешге къатышханла РФ-ни Президенти Владимир Путинни «Тийрелени юслеринден шартланы миллет амалы» къырал программаны бардырыу бла байламлы буйрукълары къалай толтурулгъанларына энчи эс бургъандыла. 2030 жылгъа къыралда аллай шартланы бир тизмесин эмда жеринден тепдирилмеген ырысхыны бир электрон картография мурдорун къураргъа белгиленеди. Ол а къырал жумушланы бютюн терк да, тынгылы да тындырыргъа себеплик этерикди.  

Жангы окъуу жылгъа хазырланыугъа да жыйылыуда энчи магъана берилгенди. Казбек Коков энчи аскер операциягъа къатышханланы сабийлерине къайгъырыуну мадарларын «Ата журтну къоруулаучулары» фондну эмда Ата журтну аскерчилерини юйюрлерини комитетини регион бёлюмлери бла бирге жарашдырыргъа буюргъанды. Херсон областьны республика шефлик этген муниципалитетлерине да сабийлени жангы окъуу жылгъа хазырлау жаны бла болушлукъ этиллигини юсюнден айтылгъанды.  Къабарты-Малкъарда уа тюрлю-тюрлю сылтаула бла къыйын болумгъа тюшген юч юйюрден сабийлеге да тутхучлулукъ этилликди.