Аты тюрлендирилгенди, иши да игиленеди

Нальчикде Пирогов атлы орамда орналгъан Диагностика араны аты Республикалы клиника медицина-хирургия арагъа тюрлендирилгенди. 

КъМР-ни Саулукъ сакълау министерствосундан билдиргенлерича, анга талай шарт себеплик этгенди. Ол санда бийик технологиялы хирургия болушлукъ тапдырылырча эм жюреклери бла къан тамырлары ауругъанлагъа багъарча бир къауум жангы амал сингдирилгенди. Андан сора да, адам кёп жылланы жашарча эм тюрлю-тюрлю аурууладан кесин сакъларча бёлюмледе да ишлерикдиле. 
Ара жангыртылып, аны тынгылы диагностика бардырыу онглары да игиленирикдиле. Аны бла бирге бюгюннгю излемлеге келишген поликлиникасы, онкологияны тинтирге болушхан амбулаториясы, паллиатив арасы да алгъындан тири ишлерча боллукъдула.

 Аны баш врачы профессор Ахмед Асланов айтханнга кёре, медицина организацияда Къабарты-Малкъар къырал университетни госпиталь хирургиясыны кафедрасыны бёлюмю да ишлейди. Мында студентле, ординаторла, аспирантла эм докторла окъуна сынамларын кючлейдиле.  

- Ара жаш медиклени билимлерин байыкъландырыргъа эм сынамларын кючлерге ахшы себеплик этерикди. Хирургия бёлюмде уруннган коллегаларым алагъа къолларындан келгенни аямай болушурукъдула. Аны себепли келир заманда мында сынамлы специалистлени хазырларыгъыбызны таукел айталлыкъма, - деп къошханды Ахмед Дзонович.