Шимал Кавказда бек уллуладан бири боллукъду

Бу кюнледе «Чегем-Агро» теплица комплексни биринчи кесеги хайырланыргъа берилгенди. Белгилисича, ол Шимал-Кавказ федерал округну айнытыуну программасына кийирилген къыйматлы инвестиция проектледен бириди. Башы жабылгъан бу бахча Шимал Кавказда бек уллуладан боллукъду. Аны къурулушуна ахча бла «ЭКО-культура» агропромышленный холдинг РФ-ни Эл мюлк министерствосуну, КъМР-ни Правительствосуну эмда Россельхозбанкны себепликлери бла къошумчулукъ этгенди.

Жангы предприятияны ачылыууна РФ-ни Президентини СКФО-да толу эркинликли келечиси Юрий Чайка, КъМР-ни Башчысы Казбек Коков, РФ-ни эл мюлк министрини орунбасары Оксана Лут,  Россельхозбанкны правленини таматасы Борис Листов къатышхандыла.

Бу магъаналы иш бла алгъышлауунда Юрий Чайка былай айтханды: «Эл мюлк Шимал Кавказда инвестицияла жаны бла ишде баш магъананы тутхан бёлюмдю. Кеси да импортну алышындырыу жаны бла къырал жумушланы хайырлы кесегиди. Жангы теплицаланы хайырындан Россейни кёп регионларыны тюкенлеринде жылны узуну жараулу кёгетле сатылгъанлай турадыла. Бу проектни бардырыуда да  бай тирлик алыргъа эмда токну аяргъа болушхан жангы амалла хайырланыладыла. Предприятие мындан ары да айнып барырын, бийик жетишимлеге жетерин тежейме. Ахшы жолгъа!».

Оксана Лут а быллай проектле аш-азыкъ къоркъуусузлугъубузну кючлендирирге уллу себеплик этгенлерин чертгенди. «Эко-культура» аты айтылгъан инвесторду, жабыкъ жерде тахта кёгетле ёсдюрюуде сынауу уллуду, бахчаланы кёбейте барады», - деп къошханды.

Теплицаны ачылыууна атап, анга къатышханла урлукъ салгъандыла.  Специалистле къонакълагъа айтханнга кёре,  предприятие шёндюгю излемлеге толусунлай келишеди эмда къыйматлы оборудование бла жалчытылыныпды. Дагъыда ол тахта кёгетле ёсдюрюучюлени юйретиуню майданы да боллукъду.

«Чегем-Агрону» биринчи кесеги  37,6 гектарны алады. Анга инвестицияладан  9 миллиард сомдан аслам бёлюннгенди. Мында томатладан бир жылгъа 19,2 минг тоннагъа дери ёсдюрюрге белгиленеди. Алгъа 461 ишчи жер къураллыкъды. Республиканы бюджетине да андан  бир жылгъа 223 миллион сом тюшерикди.

Казбек Коков бу  инвестиция проектге дайым тутхучлулукъ этиллигин айтханды. Теплица сайлай да 100 гектарны аллыкъды,  инвестицияла халда  24,5 миллиард сом бёлюнюрюкдю, тахта кёгетледен а бир жылгъа 50 минг тоннадан аслам жыйыллыкъды. Дагъыда 1226 ишчи жер къураргъа, налогга да бир жылгъа 593 миллион сом тёлерге белгиленеди, деп билдиргендиле КъМР-ни Башчысыны бла Правительствосуну пресс-службасындан.