Атын сюйюп сагъынадыла

Таныгъан, кюн сайын да терк-терк кёре тургъан адамны юсюнден жазгъан хычыуунду. Аны  бла кюн сайын тюбешгенингде, ол адам бла талай  жылны ичинде сёлешгенингде, аны юсюнден эсингде къалгъан затла, кинону экранындача, кёз алыннгда кёрюннгенлей турадыла. Танышынг жюрегинг жаратхан адам эсе, эсингде аны жарыкъ сыфаты, этген ахшылыгъы ёмюрге да  къалады. Бютюнда сёз саулукъну юсюнден барса, адам дуниясын алышындырса уа, ол киногъа бютюн къарарыгъынг келеди. Кишини кёлюне тиймесин, ансы алгъыннгы деменгили къыралны врачлары не жаны бла да айырмалы эдиле. Халкъда  атлары айтылгъан Ботталаны Хадисни, Асанланы Орусбийни, Таукенланы Магометни, Мамайланы Харунну, Курданланы Ахматны, аны жашы Магометни, Эфендиланы Илиясны (жаннетли болсунла), халкъ бюгюн да излейди. Кёплеге эс тапдыргъан врачланы  сыйлары алайды. Бечелланы Шабаз ишинден кетип, бир ненча жылдан сора республикалы больницагъа келип, аны излеп айланнганланы кёргенме.

Хулчаланы Хусей (жаннетли болсун) да аллай врач эди. Огъары Малкъарны больницасында кёп жылланы ишлеп тургъанды. Мени эсимде къалгъаны уа сабий жыллада окъууу бла айырмалы жашны къуруда махтап туруучуларыды. Бир   жол колхозгъа алма жырягъа болушургъа элтедиле. Ол  заманда кийиучю кенг бухчакъ кёнчекни тыш жанында темир тюймеле да тизилип, мектепде аты жаланда махтау бла айтылгъан Хусей да келеди.

Энди алма жыйгъанда,  терекге минмей болмаз, аллай омакъ кёнчегин жыртыр, деген къайгъым а башымдан кетмей тургъан кибикди. Бир кере уа университетге кирирге экзаменле бере айланнганымда тюбешебиз. Университетни аллында  басынып тургъан ата-аналаны аралары бла ётюп  ичине кирген жерде абынып  кетип, эшиклени сакълагъан студентле бла бирге сюелген Хусей тутмаса, кисими ачытып, экзаменнге угъай, башха жерге барыргъа тюшерик болур эди.

Эсимде къалгъан дагъыда бир тюбешиу а Тюмень шахарда болгъанды.  Узакъ, шагъырейинг болмагъан шахарда тюкен угъай, сом хайыр да тюшюралмай тургъанда, Хусейге тюбеп къалабыз. Бек иги къонакъбайлыкъ этеди бизге. Ол дуниясы жарыкъ болсун. Университетни медицина факультетин бошагъан жашны ары ишлерге жиберген эдиле. Алгъын аллай тёре болуучу эди-дипломну алгъандан сора иш бла да жалчытхан. Тюменьде темир жолну больницасында неврология бёлюмню таматасы болуп ишлеген жеринде атын иги бла айтдырып тургъанына бек къууаннган эдик. Алай юйюне къайтса,  ишин жангыдан башларгъа тюшерине жарсыгъан эдим. Ол заманда мындан эсе  тышында ишлегенле къуллукъгъа, билиминги ёсдюрюрге элтген атлауучланы терк ёрлеп, жетишимле болдургъанларына кесим шагъатма. Былайда специалистле керекли жерде тамата болгъанлыкъгъа, мында билиминг жетмей къалыргъа къоркъуу барды дерикле чыгъарыкъдыла. Аны айта келгеним, терен билим, эртте кеч болса да, бийиклеге да чыгъарады.

Хулча улу КъМКъУ-ну медицина факультетин бошагъанлы жашаууна къарай келсенг, окъумагъан, кёп тюрлю курслагъа жюрюп, билимин ёсдюрмеген жылы болмагъанча эди. Заман  да къайдан таба болур дер эдинг. Тюменьде,  Нальчикни бешинчи номерли поликлиникасында (анда неврология бёлюмню таматасы болуп тургъанды), Огъары  Малкъарда ишлегенинде да Хусей кёп саусузгъа бакъгъан эди. Врач айтханны этип турсакъ, быллай кюннге къалмаз эдик. Хулча улу хар саусузну кесине  ийнандыра билгенди. Саусуз сен айтхандан чыкъмай, саулугъу игиге айланнгынчы, кесин тап жюрютюрча этдирирге кёп врачны къолундан келмейди. Хусей бу дарманны ичсенг  иги боллукъса десе, саусузла жашны сёзюне бек ийнаныучу эдиле. Алайды да, бу огъурлу врач эллилерин ыразы этер ючюн къолундан келгенни аямай эди. Аны ючюндю огъары малкъарлыла, сюйген врачлары дуниясын алышындыргъандан сора да, аны ариу сёз бла эсгергенлери.