Аккаунтугъуз урланмазча, хар кимге да ышанмагъыз

Аманлыкъчыла тынч ахчалы болур ючюн, жангыдан-жангы амалла къурайдыла. Юлгюге «Телеграмда» инсаннга хакъсыз премиум-подписка этерге билдириу келеди, алай аны къабыл кёргенлей, счётдан ахча кетеди. Сора, биреуню парольларын ачыкълагъанлай, ала башха адамлагъа саугъа алыуну юсюнден ссылкала жибередиле, тюз да аны басханлай а официальныйге ушагъан жалгъан телеграм-ботха киресиз. Ызы бла саугъаны алыр ючюн, СМС-де келген парольну жазарыгъызны излейдиле, сиз аны кийиргенлей, битеу данныйлеригиз хыйлачылагъа ётедиле.

Дагъыда жайылгъан амалладан бири – конкурсда къатышханладан бирине, сёз ючюн тенгни сабийи ючюн къол кётюрюрюгюзню тилеселеди. Сиз ол страницагъа ётгенлей, биягъы жалгъан ботха тюшериксиз. 

Алай бла аккаунтугъузну сакълар ючюн, профилигизге башха адамла киралгъанларын бла къалгъанларын тохташдырыгъыз. Аны ючюн алгъа «Настройкалагъа, анда «Устройствогъа» эм «Активные сеансы» вкладкаланы ачыгъыз. Анда аккаунтугъузгъа къайдан кирилгени эсепленеди. Сиз танымагъан устройстволадан кирген эселе, кёрлюксюз.

Ахча тилеп неда конкурсда къол кётюрюгюз деген сообщениялагъа эс бурмагъыз, алгъа аланы ийген танышыгъыз эсе, анга сёлешип кёрюгюз, ким биледи, аны данныйлери урланып эселе уа. Белгисиз ссылкаланы ачмагъыз, авторизация парольну кишиге кёргюзтмегиз, аны башха сайтлада жазмагъыз. Эки къатлы аутентификацияны салыгъыз; «Настройки» - «Конфиденциальность» - «Двухэтапная аутентификация». Анда «Облачный пароль» дегенде пароль къурагъыз, къошакъ сёз да жазаргъа боллукъду. Жангы устройстводан киргенде сеть аны сурамай къаллыкъ тюйюлдю, алай бла аманлыкъчылагъа да жол кесилликди