Суратлада – устаз классдан тышында

Бу кюнледе КъМР-ни Жарыкъландырыу эмда илму министерствосунда бардырылгъан пресс-конференцияда сёз «Устаз классдан тышында» деген   конкурсну юсюнден баргъанды. Аны ишине республиканы жарыкъландырыу эмда илму министфри Анзор Езаов, КъМР-ни маданият  министрини орунбасары Рита Таова, Нальчик шахарны айнытыуну «Платформа» институтуну башчысы Оксана Шухостанова, къурау комитетни къауумуна киргенле да къатышхандыла.

Анзор Езаов конкурсну юсюнден тынгылы хапар айтханды. Ол Устазны бла насийхатчыны жылына жораланнганын да чертгенди. Анга мектепледе, колледжледе, вузлада окъутханла, башхала да къатышыргъа эркиндиле. Чыгъармала конкурсну юч бёлюмюне кёре сайланырыкъдыла: «Дуния устазны кёз къарамында», «Устаз суратлада», «Мени юйюрюмде  устаз».  Сёз ючюн,  биринчисинде   устаз кеси алгъан суратла болургъа керекдиле.

Экинчисинде  устазланы, преподавательлени сыфатлары, аланы ишлеулери, спортда, илмуда, жандауурлукъда, волонтёр ишде, дагъыда  бош заманларында не чыгъармачылыкъ бла кюрешгенлери, сабийле бла мектепден, колледжден, вуздан тышында болгъан кезиулери кёргюзтюлген   суратла  изленедиле.

«Мени юйюрюмде устаз» деген бёлюмде уа устазланы неда  сурат алгъанны  жууукъларыны суратлары болургъа керекдиле.   

Журналистлени хорлагъанланы бла саугъалы жерлеге чыкъгъанланы  ишлерин къайда кёрюрге боллукъду, деген  сорууларына жууап бере,  жарыкъландырыу эмда илму министрни орунбасары  Екатерина Мисостова бек иги суратла  тюрлю-тюрлю конкурслада кёргюзтюллюклерин билдиргенди. Бек баш кёрмюч а устазланы  тёрели август жыйылыуларында къураллыгъын, андан сора уа ала   КъМР-ни 100-жыллыгъы атлы паркда, сабий чыгъармачылыкъны «Кюн шахар» академиясында  да кёргюзтюллюклерин айтханды. Дагъыда сайланнган чыгъармала  энчи жыйымдыкъ болуп   басмаланырыкъдыла.

Конкурсну жорукъларыны юсюнден айта, Екатерина Мисостова ол заочно халда бардырыллыгъын да чертгенди.«Тюрсюнлю, къара-акъ суратла да алынырыкъдыла. Бир адам юч суратдан кёп жибермезге керекди. Бюгюннге жыйырма тёрт иш тюшгенди бизге, ала аслам бола барлыкъларына бек ышанама. Суратла 30 июньнга дери алынырыкъдыла,  15 июльгъа дери уа  эсепле чыгъарыллыкъдыла», – деп белгилегенди ол.