Биз тюшле кёргенибизде, мыйыбыз а жукълапмыды?

Биз хар тюш кёргенибиз бла аны бир затха тёрелеп башлайбыз. Терсми болурбуз?  Аны юсюнден Нальчик шахарда Ара поликлиниканы терапевти Бёзюланы Жамиля бла ушакъ этгенбиз.

- Илму тюшлеге ийнанамыды?

- Угъай. Аны бла бирге битеу халкълада да хар тюшню магъанасы барды. Зигмунд Фрейд тюш адамны жашырын дуниясына эшикди, дегенди. Сёз ючюн, адам жазыучу болургъа сюе эсе, кеси уа бухгалтер болуп ишлей эсе, тюшюнде жазарыкъ китпларыны сюжетлерин кёрюрге боллукъду. Къызла кеслерини энди боллукъ тойларын да кёредиле.

Жюрегибизде тамырланнган умутларыбыз, сыфатла болуп, тюшлерибизге келедиле. Аны бла бирге адам узакъда бола тургъан ишлени да сезген этеди. Ол сейир тюйюлдю. Гылыу чычханла батарыкъ кемеден къачханлары белгилиди. Адам да сюйгенлерин сезеди. Сора аланы къадарларын тюшюнде кёрюрге болады.

- Биз тюш кёрген заманыбызда  мыйыбыз жукълаймыды?

- Жашауубузну ючден бирин жукъуда ётдюребиз. Ол бизге мыйыбыз ишлегенин тохтатып, солур ючюн керекди деп, кёп заманны аллай оюм жюрюгенди. Алай бюгюн белгилиди: кече мыйы бютюн тири болады. Жыйырманчы ёмюрде мыйы жиберген электробелгилени эсеплерге юйреннгенибизлей, адам жукълап тургъан заманда аны мыйысы бютюн къыстау ишлегени ачыкъланнганды.

Андан быллай соруу чыгъады: кече мыйы не ишлейди? Алимле жаныуарлада сынаула бардыргъандыла. Итлеге бир ауукъ заманны жукъларгъа къоймай тургъандыла. Беш-алты кюнден ала ёлюр чекге жетген эдиле. Алай андан сора ала 10-12 сагъат окъуна жукъласала, жангыдан тирилип, чабып айлана эдиле.

Гылыу чычханла бла сынаула уа ахырына жетдирилгендиле. Бир ненча кюнню жукъламай тургъандан сора ала ёлюп къалгъандыла, ич органлары ауруп, аш орунлары неда базыкъ чегилери тешилип. Жаланда мыйыларына бир тюрлю хата жетмегенди.

- Ол къужурлукъну къалай ангылатыргъа боллукъду?

- Мыйыны нейронлары кюндюз тышындан келген белгилени - кёзге кёрюннгенни, къулакъ эшитгенни, сезиуню кеслерине сингдирип, аланы тинтедиле, оюмлайдыла. Адам жукълагъан заманда уа, тыш дуния бизге жокъ болгъанда, ала ич органладан келген белгилени аладыла. Аланы биринде окъуна къыяуу болса, ол генетика жорукъгъа кёре ишлемей тохтаса, нейронла ол кемчиликни кетериуню мадарын этедиле.

-Ахыры бла да жукъламагъан жаныуарла бардыла, дейдиле. Сёз ючюн, пилле…

-Ол жомакъды! Жукъламагъан жаныуар жокъду. Жаланда сюелип жукълагъанла бардыла. Аланы чархлары башха тюрлю къуралгъандыла - сюеклери «жабылып» къаладыла. Аны себепли ала аууп къалмайдыла. Алай пилле окъуна бирде жатып жукълайдыла,шаугютлерин бошлап.

-Тюшню юсюнден жангы оюм илмуда къаллайды?

- Алимле айтханнга кёре, мардагъа кёре, адам жукълагъанда, аны эси да ёчюледи. Алай толусунлай ёчюлмей къалгъан кезиуле да боладыла. Ол заманда, мыйы ич органла бла байламлыкъ жюрютгенде, аш орундан, бюйрекледен неда чегиледен чыкъгъан белгиле, жангылып, адамны эсине сингедиле. Андан а анга бир тюрлю сыфатла, затла кёрюнедиле. Ол а аланы не магъаналары болур деп сагъыш этеди. Алайды да, билгич тюшле жокъдула, ала жаланда ич органланы белгилеридиле. Алай не сейир, жашау а бизге башха юлгюле кёргюзтеди: бир-бирде адам тюшюнде кёргени тюнюнде болады.

Адам кереклиси чакълы бир жукъламай, кесин къыйнаса, аман тюшле да кёрюп башлайды.