Сютден этилген ашарыкъла бла анга ушатылгъан затла энчи тапкалада сакъланыллыкъдыла

Июльда кючюне бир ненча федерал закон киргенди. Алагъа кёре, финансла, аш-азыкъ продуктла, кредит бериуню низамы тюрлендирилгендиле.  Башхача айтханда, ала къыралны хар инсаныны сейирлери бла байламлыдыла.

Алай бла, быйылны экинчи жарымындан башлап, саулукълары осал, сакъат сабийлеге къарагъанлагъа тёлеуле эки кереге кёбейгендиле. Бир жерде да ишлемеген ата-ана неда осуйлукъ этген адам айгъа 5,5 минг сомну орунуна 10 минг сом аллыкъды.

Сютден эм анга ушашдырылгъан затдан этилген продукцияны бир биринден айыргъан тынч боллукъду. Законнга кийирилген тюрлениулеге кёре, сютден жарашдырылгъан ашарыкъла тюкенде энчи тапкалада сакъланырыкъдыла эмда аланы юслеринде: «Сют жау алышынмагъан продуктла» деген жазыу болургъа тийишлиди. Аллай жауу болмагъан ашарыкъла уа, адамла ала сютден этилмегенлерин ангыларча, башха тапкада жыйыллыкъдыла.

Россейде чыгъарылгъан эм тышындан келтирилген аякъ кийимлени энчи маркировкалары болургъа керекди. Белги чурукъгъа эмда аны тышына жабышдырыллыкъды. Алай бла, аякъ кийимни чыгъаргъан предприятиядан башлап, ол алыучугъа жетгинчи битеу «жолун» кёрюрге онг боллукъду. Анда чурукъну тикген фирманы, ол къаллай териден этилгенини юслеринден  шартла да басмаланырыкъдыла.  Законну авторларыны акъылларына кёре, быллай низам аякъ кийимлени качествосун игилендирирге, аны бла бирге уа контрафактны азайтыргъа болушурукъду.

Быйылны экинчи жарымындан башлап кредитни процент ёлчемине чек салынады. Кючюне кирген законнга тийишлиликде, кюннге ол 1 процентден, алай бла жылгъа уа 365 процентден озмазгъа керекди. 

ОСАГО келишимни къабыл кёрюу бла байламлы низамда да бардыла тюрлениуле. Страховой компания  жангы келишимни къабыл кёрюрге онгу жокъ эсе, аны юсюнден сайтда билдирирге борчлуду, анда полис жарашдырыу бла байламлы бетле да жабылыргъа тийишлидиле. Компания кеси аллына полислени  сатмай тохтаргъа эркин  тюйюлдю, ол жаланда Россейни банкы  лицензияны сыйыргъан,   анга чек салгъан неда организация келишимлени тохташдырылгъан ёлчемден кёп  сатхан кезиуледе этиледи.

Къонакъ юйде отоула эллиден кёп эселе, алагъа «жулдузла» берилликдиле.  Аллай сертификаты болмагъан объектлеге уа ишлерге эркин этиллик тюйюлдю. Къонакъ юй рекламада анга берилген «жулдузланы» кёбейтип кёргюзтсе уа, административ тазир салынырыкъды. 

31 июльда   ипотека каникулланы юсюнден закон кючюне кирликди. Аны бла быллай кредит бла хайырланнган адам къыйын жашау болумгъа тюшсе (аллай кезиуле законда белгиленипдиле) хайырланыргъа эркинди. Солуу кезиу алты айгъа дери барады. Бу заманны ичинде тёлеулени ахырда этмезге неда аланы азайтыргъа онг бериледи. Бу болушлукъ бла жаланда бир кере хайырланыргъа жарайды.