Приём бардыргъандыла, эсгертиуле этгендиле

Кёп болмай КъМР-ни саулукъ сакълау министри Рустам Калибатов Нальчикде коллегалары бла бирге  Къашхатауда Черек районну ара больницасыны поликлиникасында приём бардыргъанды. Ол кюн  89 адам специалистге къаратыргъа онг тапхандыла.

Миистр бла бирге консультацияны штатлада болмагъан баш специалист –эндокринолог Инна Шихалиева, Кардиодиспансерни кардиологу Мурат Агиров, Онкодиспансерни онколог-маммологу Марина Гендугова, Республикалы клиника больницаны   ортопед- травматологу Алим Макоев  бардыргъандыла.

Врачла саусузлагъа къарагъандыла,  саусузланы бир къауумуна республиканы медицина организацияларында  багъылыргъа   неда операция этерге кереклисин эсгертгендиле. Министр кеси къыйын ауругъанлагъа эм обследованияны ётерге келген он саусузгъа къарагъанды.     

 Рустам Михайлович айтханнга кёре, быллай ишчи жолоучулукъланы чеклеринде саусузла  диагностика бардырыргъа эм багъыу иш къалай баргъаны бла шагъырейленирге онг береди.

Алгъаракълада «Саулукъ сакълау» миллет проектге кёре,  поликлиникагъа тынгылы ремонт этилгенди. Ол себепден министр районну адиминистрациясыны башчысы Къулбайланы Алан бла бирге стационарны бёлюмлеринде  болгъанды, медицина болушлукъ къалай берилгенине къарагъанды.

Аяулу технологиялагъа кёре, поликлиникада энчи ауруулагъа къарагъан специалистле, терапевтле, диагностика бардыргъан бёлюм эм лаборатория да саусузгъа тап болурча орналадыла. Аны бла бирге жангы диагностика бардыргъан оборудование алыннганды.

Рустам Калибатов специалистлеге  жангы цифралы технологияланы  хайыры бла жазылгъанларын эм навигация картала  хайырланнганларын да жаратханды.

 Аны бла бирге кемчиликле да тинтилгендиле, аланы къысха заманда кетерирге буюргъанды. 

Саулукъ сакълау министрни бу ючюнчю ишчи жолоучулугъуду, энди майда ол Терк районну ара больницасыны поликлиникасында боллукъду.

Министр окъуучула бла тюбешгенди

Кёп болмай КъМР-ни саулукъ сакълау министри Рустам Калибатов «насийхатчыны школу» проектге кёре, Нальчикни 4-чю номерли гимназияны окъуучулары бла тюбешгенди. Ол жылны аллында  КъМР-ни Саулукъ сакълау министерствону башламчылыгъы бла ишлеп башлагъанды. Аны магъанасы медицина усталыкъ  алыргъа сюйген  школчулагъа  билим алыргъа эм республикада урунурча  болушургъады.

Бюгюнлюкде медицина организацияла бла билим бериу учрежденияла байламлыкъда ишлерча марда право мурдор къуралгъанды. Анга кёре гимназияны медицина классы  Республикалы клиника больницагъа бойсунады.  

КъМР-ни Саулукъ сакълау министерствону келечилери, медицина  усталыкъны сайлагъан саусузлагъа багъаргъа  юйреннгенден сора да,  дайым билимин ёсдюргенлей турургъа керекди. Республикалы клиника больницаны баш врачы Хасанби  Тетов айтханнга кёре, врачны ишини юсюнден айта, бу жаны бла усталыкъ алгъан бла чекленип къалмай, сынамларын ёсдюргенлей турургъа кереклисин билдиргенди.

Тюбешиуге келген гимназистле – химия – биология классланы  келечилери медицина усталыкъ алыргъа сюйгенлерин билдиргендиле. Ала саулукъ сакълау бёлюмню келечилери бла ушакъгъа тири къатышхандыла, кёп тюрлю соруула да бергендиле. 

Жууукъ заманда жаш адамла республикалы клиника больницада медиклени ишлери бла шагъырейленирге эм  сайлагъан усталыкъларыны юсюнден толуракъ билирге онг табарыкъдыла. Аллай экскурсияла графикге кёре  бирси школчулагъа да бардырыллыкъды. 

Жангы излемлеге келиширикди

Бу кюнледе «Саулукъ сакълау» миллет проектге кёре Бахсан шахарны 1-чи номерли поликлиникасына тынгылы ремонт этиле турады. Ол 1974 жылда ишленнгенди, эм эрттеден бери къаралыргъа керек болуп тургъанды. Юч жыл мындан алгъа мекямны башында къанжалларын, терезелерин алышхандыла эм тыш къабыргъаларын да жангыртхандыла. Алай болгъанлыкъгъа, танг кесек жумуш этилмей къалгъанды.

 Бусагъатда подряд организацияны келечилери мекямны ичи бла кюрешедиле. Ишлени кезиуюнде саулай инженер коммуникацияла алышынырыкъдыла эм сюртюу-бояу ишле да тамамланырыкъдыла. 

Поликлиниканы бир сменагъа 750 адамгъа къарар онгу барды. Бюгюнлюкде аны участогуна 60 минг адам киреди. Саусузлагъа кюндюз багъарча 20 жатар жери барды. 

Стационар аяулу технологиялагъа кёре жарашдырыллыкъды.  Саусузла бир бирге къатышмазча зонала къураллыкъдыла, жангы информация   системала эм навигациялы картала да ишлерикдиле.