Казбек Коков Ораза байрамны солуу кюннге санауну юсюнден указгъа къол салгъанды

КъМР-ни Башчысы Казбек Коков Ораза байрам бла байламлы 21 апрельни солуу кюннге санауну юсюнден указгъа къол салгъанды.

«Дин тутаргъа эркинликни  эмда дин биригиулени юсюнден» Федерал законну 4-чю статьясыны 7-чи пунктуна тийишлиликде эмда КъМР-ни Муслийманларыны дин управлениясыны Ораза байрам бла байламлы тилегине кёре 2023 жылны 21 апрелин Къабарты-Малкъар Республикада солуу кюннге санаргъа»,-деп айтылады документде.

Указ республиканы Башчысыны энчи сайтында басмаланыпды.

Алгъаракълада Къабарты-Малкъарны Башчысы Казбек Коковну указы бла Радоницаны – ёлгенлени эсгериуню кюню – бла байламлы 25 апрель солуу кюннге саналгъаныны юсюнден билдирилгенди.