Каратечилерибиз – къыралда эм кючлюлени санында

Элбрус районну олимпиада резервли спорт школуну бюгюнлюкде Симферопольда жарау этген каратечилери эришиуледе жетишимлери бла къууандыргъанлай турадыла.

Алгъаракълада уа спортчуларыбыз Россейни биринчилигинде бла чемпионатында сермешгендиле, алагъа уа 800 адам къатышхан эди. Анда кеслерини ауурлукъ эм жыл сан къауумларында Къурманланы Коншао-Бий, Керим Алихаджиев бла Андрей Вихорь хорлагъандыла. Ала ючюсю да бешишер тюбешиу бардыргъандыла, энди дунияны чемпионатында сынашырыкъдыла, ол а сентябрьде Индонезияны Джакарта шахарында боллукъду. Къырал  даражада саугъаланнганланы къауумуна Исмаил Юнусов къошулгъанды.

Ызы бла Сочиде 27 региондан спортчуланы къатышыулары бла «Кавказны кубогу – 2023» битеуроссей турнир ётгенди. Анда да Керим Алихаджиев – биринчи, Андрей Вихорь а ючюнчю жерлени алгъандыла. Новосибирскде да «Жетишимлиликни кубогу» болгъанды, анда къыралны 42 регионундан, Беларусьдан бла Къазахстандан 1820 каратечи сермешгендиле. Быллай уллу конкуренцияда Къурманланы Коншао-Бий доммакъ майдалны къытханды. Спортчуланы барысын да тренерле Руслан Нахушев бла Владимир Юнусов юйретедиле.