Аскерчилеге бла аланы юйюрлерине болушлукъ кенгертиледи

«Единая Россия» энчи аскерчи операциягъа къатышханлагъа болушлукъну андан ары бардырады. Бу кезиуге фронтну кереклерине   20 минг тонна жандаруурлукъ жюк бла энчи техника берилгенди.   Донецк эм  Луганск халкъ республикалада бла  Херсон эм  Запорожье  областьлада жандауурлукъ жюк  юлешиннген 25 ара къуралгъанды.

 Аш-суу, кийимле, жашау этерге керекли башха затла бла жюкле къыралны битеу регионларындан да кюн сайын ашырыладыла. Партияны Тюменьде бёлюмюню келечилери Краснодонну халкъына 20 тонна аш-суу жыйгъандыла. Москваны волонтёрлары уа Мариупольгъа къурулуш инструментле жибергендиле, дагъыда медицина оборудование, дарманла, операция бардыргъанда керекли затла бардыла.   

Болушлукъну жерине «Единая Россияны» «Жаш гвардиясыны» эм «Волонтёр ротаны» волонтёрлары ашырадыла эм  юлешедиле. Партияны жандауурлукъ жумушларына   жаш тёлю организацияланы 1,5  мингден аслам келечиси къатышадыла. Апрельни ал кюнлеринде уа Мариупольну, Донецкни эм  Луганскны саулукъ сакълау учрежденияларында медиклеге болушлукъгъа энтта 50 адам кетгенди.   Россейни битеу регионларындан 800-ден аслам врач-волонтёр болушлукъ бередиле, ол санда фронтда да.

Партия   «Единая Россия къутхарады» проектни башлагъанды. Аны чеклеринде регионлада медицина учреждениялагъа ауур жарала алгъан аскерчилени бла мамыр адамланы ашырадыла, алагъа медицина эм эм реабилитация болушлукъ бериледи. 

   Мариупольда, Северодонецкде, Лисичанскда  партия «Ридовка болушады» жандауурлукъ фонд бла  бирге адамла жылынырча жерле къурагъандыла. Шахарлада суу, жылыу, ток бла жалчытыуда чырмауланы  эсге алсакъ, ол бютюнда магъаналыды. Алада   чай ичерге, жылыныргъа боллукъду. Аны бла бирге  уа керекли документлени жарашдырыргъа, законланы ангылатыула алыргъа да онг барды.

Аскерчилеге уа кийимле, энчи техника, машинала берилгендиле, фронтха 1,5 мингден аслам радиостанция,   квадрокоптерле,   тепловизорла, генераторла, бронемашинала, къурулуш техника ашырылгъандыла.  Аскерчилени юйюрлерине энчи эс бурулады. Бюгюнлюкде партияны себеплиги бла 25 мингден аслам юйюр хайырланнгандыла.

 «Единая Россияны» КъМР-де регион бёлюмюню толтуруу комитетини башчысы, партияны волонтёр штабыны регионда башчысы   Дмитрий Парафилов   KABARDIN-BALKAR.ER.RU сайтны журналистлерине айтханыча,  Донбассны халкъына, эркин этилген регионлагъа, энчи аскерчи операциягъа къатышханлагъа бла аланы юйюрлерине болушлукъну республика  биринчи кюнден да бардырады.

 - Партияны регионда бёлюмю, башха организацияла бла бирге жандауурлукъ жюклени къурайды. Бу ишге депутатла, жаш гвардиячыла, волонтёрла, энчи инсанла да тири къатышадыла. Партияны жамауат приёмныйинде мобилизациягъа тюшгенлени керекли затланы жыйыу хар кюн да бардырылады. Бюгюнлюкде 65 тонна жюк ашырылгъанды. Ала жылы кийимледен, аш-суудан,  медицина керекледен, гигиена затлада къуралгъандыла.  Дагъыда школчула кеслери хазырлагъан  открыткала да ашыргъанбыз, - дегенди Дмитрий Парафилов.