Кёргенлерине бюсюрегендиле, эсгертиуле да бергендиле

Кёп болмай КъМР-ни саулукъ сакълау министри Рустам Калибатов гематология жаны бла илму медицина излем араны «НМИЦ гематологии»  специалистлери бла тюбешгенди. Аны чеклеринде  Республикалы клиника больницада, Онкодиспансерде, Сюд медицина экспертизаны бюросунда, Къан къуйгъан станцияда эм Нальчикни 1-чи номерли  клиника  больницасында болгъанларыны юсюнден ушакъ баргъанды.

Гематология жаны бла  регион эм ведомстволу управленияны таматасы  Ольга Лазарева айтханнга кёре, буруннгу жыл бла тенглешдиргенде ахшы тюрлениуле бардыла. Алай болсада бир къауум кемчилик да тинтилгенди. Болсада мындан арысында  институтну келечилери   республикада коллегалары бла бирге медицина организацияланы таматалары да къошулуп саусузлагъа  тийишли болушлукъ  тапдырылырча мадар этерге келишгендиле.

 Къонакъла Къан къуйгъан станцияны ишине энчи багъа бичгендиле. Аны   инфраструктурасына, донорла бла байламлыкъ жюрютюлгенине эм саулай службаны ишине ыспас этгендиле. 

Бюгюнлюкде  станция къан алып,  жарашдырып, асырап эм керек инсанлагъа тапдырып   саулай республикада кеси кюрешеди. Ол уллу ауурлукъ бла ишлесе да магъаналы борчну толтурады. 

Жыл сайын донорланы санына къошула баргъаны къууандырады. Анга себеплик этген шартладан бири станцияны машинасы  районлагъа да чыгъа туруучусунданды. Былтыр донарланы саны    9 443 адамгъа жетгенди. Ол буруннгу жыл бла тенглешдиргенде 27,4 процентге кёпдю.

Былтыр эллиге жууукъ  донорлукъгъа чакъыргъан  акция бардырылгъанды, анга 2700 адам къатышханды.  Андан сора да, службаны келечилери 25 кере шахарлада бла  районлада болгъандыла. Аны чеклеринде да  1 351 адам  къан берирге  онг тапханды. 

Эсге сала айтсакъ, "Культурный код донора" деген битеуроссей акцияны эсеплерине кёре, бу номинацияда  Нальчикни Къан къуйгъан станциясы лауреат болгъанды.  Эки жыйырмагъа жууукъ къан берген 18 донор а  «Россейни сыйлы донору» белгиге   тийишли кёрюлгенди. Дагъыда 626  донор аркъа сюеклеринден жиликлерин  берирге сюйгенлерин айтып,  Федерал регистрге жазылгъандыла. 

Бюгюнлюкде Къан къуйгъан станциягъа тынгылы ремонт этилгенди  эм жангы оборудование бла да  жалчытылыннганды.