Бизнесни хайырлы бардырыр онгла къуралгъандыла

Бу кюнледе Басхан ауузунда Минги тауну тийресиндеги эки бош участкагъа къараргъа инвесторла келгендиле. Аны юсюнден «Кавказ.РФ» акционер обществону пресс-службасы билдиреди. Алай бла энчи экономика зонада 3 минг адам сыйынырча къонакъ юйле, спорт комплекс, тюбинг-парк эм черек жагъасы бла жаяу жолчукъ ишлер мурат барды.

«Кавказ. РФ» АО-ну таматасы Андрей Юшманов чертгеннге кёре, инвесторланы  объектге келтирип танышдырыуну магъанасы уллуд. Алай бла предпринимательле ахчаларын не затха къоратырыкъларын игирек ангылайдыла. Бу жолгъу къауумда 10 федерал эм регион компанияланы келечилери бар эдиле. Бу жол алагъа 24 гектар жерни кёргюзтгендиле.

Сёз ючюн, бир проект бла бу тийреде 1170 адам жашарча «шале» халда 4 къонакъ юй ишлер мурат барды.

Бу ишге КъМР-ни Правительствосуну, «Сбербанкны» эм «Промсвязьбанкны» келечилери да къатышхандыла.

Акционер обществону специалистлери «Эльбрус» курортну 2025 жылгъа дери айныууну юсюнден айтхандыла. Алай бла лыжа трассаланы узунлукъларын 35 километрге дери жетдириргеди, 6 жангы канат жол эм 5700 адам сыйынырча къонакъ юйле да ишлергеди.

«Кавказ.РФ» акционер обществону таматасыны орунбасары Николай Гончаров билдиргеннге кёре, битеу бу затланы жашауда бардырыргъа къошумчулукъ этериклеге энчи онгла къураллыкъдыла. Сёз ючюн, ала, башхала бла тенглешдиргенде, тюшюрген файдаларына аз налог тёлерикдиле, жер эм мюлк налогдан бир къауум заманнга эркин этилликдиле, болгъан инфраструктуралагъа энчи эркинлик алмай къошулургъа боллукъдула.

- Бизнесни тап эм файдалы бардырырча онгланы биз къурагъанбыз. Энди бек башы - проектлени ишлетиуге таукел болууду, - дегенди ол.