Газны, токну, сууну эсеплеучю приборланы орнатыу кимни борчуду?

Юйледе таза сууну, газны, электрокючню эсеплеген приборланы орнатыу тийишли предприятияланы боюнундады. Алай приборланы ким сатып алыргъа керекди, деген соруу чыгъады. Аны КъМР-ни Энергетика, тарифле эмда жашау журтлагъа надзор этиу министерствосунда былай ангылатадыла:

РФ-ни Правительствосуну «Энчи иели эмда кёп фатарлы юйледе жашагъан хайырланыучулагъа коммунальный жумушланы бериуню юсюнден» деген буйругъу 2011 жылда 6 майда къабыл этилгенди. Анда айтылгъаннга кёре, быллай приборланы хайырланыу, сакълау, алышындырыу толусунлай иелени кеслерини боюнларындады. Ол себепден аны сатып алыргъа да ала кеслери борчлудула.

Быллай приборла орнатылгъандан сора бир айдан кеч къалмай хайырланып башланыргъа керекдиле. Анга деп фатарны неда юйню иеси ресурсла бла жалчытыу компаниягъа заявление берирге борчлуду. Берилген жумушланы багъасы уа аны ызындан келген айдан башлап прибор кёргюзтгеннге кёре тергелип тебирейди. Приборну хайырланыугъа алгъанлары ючюн а компаниялагъа абери тёленмейди.

Дагъыда счётчиклени хайырланыргъа жараулу болжалы болады. Бу информация приборну техпаспортунда басмаланыучуду. Ол заман къачан жетеригин эсде тутаргъа керекди эмда андан кеч къалмай анга къаратыргъа (проверка). Ол этилмесе – ызы бла бериллик тёлеу, прибор кёргюзтгеннге кёре угъай, нормативге тийишлиликде тергелликди.