Байрамгъа атап – ёрлеу

Къабарты-Малкъарны альпинизмден, таулагъа ёрлеуден бла спорт туризмден федерациясы тарых, маданият эм башха магъаналы кюнлеге атап, таулагъа ёрлеулени дайым къурайды. Быйыл да, алгъа жылладача, Малкъар халыкъны жангырыуу кюнюне жорланып, аслам адамны къатышыуу бла Бука-къаягъа неда башха аты Науджидзагъа ёрлеу болгъанды, анга къошумчулукъну «К вершинам» клуб да этгенди. 

Аны бийиклиги 2948 метрди, анга ёрлерге республиканы жер-жерлеринден 60 адам – туристле, альпинистле, тири солууну сюйгенле, студентле бла къутхарыучула – келгендиле. Ала къаяны башында малкъар миллет кёчгюнчюлюкде сынагъан азабны юсюнден билдириу къанганы орнатхандыла. Алагъа республиканы Курортла эм туризм министерствосундан таугъа чыкъгъанларыны юсюнден шагъатлыкъ къагъытла берилгендиле.

Ёрлеуге къатышханланы къоркъуусузлукъларын МЧС-ни Элбрус бийик тау излеу-къутхарыу отряды бла От тюшюуге къажау-къутхарыу отряд жалчытхандыла.