Партияны башламчылыкълары къабыл кёрюлгендиле

РФ-ни Президенти Владимир Путин «Единая Россияны» Къырал Думада фракциясыны башчысы Владимир Васильев бла тюбешиуде партияны келечилерине патриот ниетлени жайгъанлары, социал-экономикада магъаналы проектлени тамамлагъанлары ючюн ыразылыгъын билдиргенди.

 - «Единая Россия» парламентде уллу ишни толтурады, политика жашаугъа тири къатышады. Социал-экономиканы айнытыуда магъаналы башламчылыкъла этеди, ол санда инсанланы эркинликлерин къоруулау, социал сфераны айнытыу жаны бла эм башхала. Халкъла аралы даражала уа патриот ниетледе къаты турады,-дегенди къыралны оноучусу.

  Владимир Васильев «Единая Россия» Къырал Думада кёпчюлюкню партиясыча къоркъуусузлукъну сакълаугъа, адамланы сейирлерин жалчытыугъа бурулгъан оноуланы чыгъаргъанын белгилегенди. Фракция Президентни  Посланиясында салыннган борчланы жашауда бардырыу жаны бла магъаналы ишни толтурады. Аны чеклеринде юч законопроект хазырланып, къабыл кёрюлгендиле: жангы регионланы культура жашаугъа сингдириу, энчи сакъланнган жерледе туризмни айнытыу эм бир-бир экономика аманлыкъла ючюн жууаплылыкъны жумушатыу жаны бла.

Биринчи окъулууда 15 законну проектин  сюзюлгенди, аланы арасында халкъны иш бла жалчытыу жаны бла документ да. Владимир Васильев къыралда урунуу рынокда болум ышаннгылы болгъанын чретгенди. Болсада партия билимли кадрланы  хазырлау жаны бла башламчылыкъла этгенди. Дагъыда депутатланы къараууна предпринимательлени эркинликлерин сакълау жаны бла документ да берилгенди.

Энчи аскерчи операциягъа къатышханлагъа бла аланы юйюрлерине себепликни мадарларына хазырланадыла. «Ветеранлагъа хакъсыз юридический болушлукъ бериу, къаугъаланы ветераныны статусун атау,   2014 жылдан башлап, Донбассда кеслерини ыразылыкълары  бла къуллукъ этгенлеге себеплик жаны бла мадарла бардыла.  Юйюрлеге болушлукъ бютюнда магъаналыды.  Энчи аскерчи операциягъа къатышханлагъа бла юйюрлерине кредит каникулла бериледиле, жашау журт коммунал жумушла ючюн жыйылгъан борчха  тазир салынмайды. Дагъыда аскерчилени ишчи жерлери сакъланады»,-дегенди Васильев.

 Ол айтханыча, депутатла СВО-гъа къатышханланы юйюрлери бла дайым да тюбешедиле. Ол а фронтха  артыкъда керек болгъан затланы билип, аланы тапдырыргъа онг береди.

Владимир Васильев партияны халкъ программасын жашауда бардырыуну юсюнден да айтханды. Регионлада социал объектлени  къурулушларына конрольгъа жеринде депутатла жууаплыдыла. «Программаны чеклеринде ишленнген хар объектде болумну юсюнден билебиз. Школла, саулукъ сакълау учрежденияла – ала адамлагъа бек магъаналыдыла»,-дегенди ол.

  Школланы тынгылы жангыртыуну юсюнден айтханда, жылны ахырына дери 1,5 мингден аслам мекямны тапландырыргъа керекди къыралда. Колледжлени бла техникумланы тапландырыу жаны бла программа керек болгъанына эс  бурулгъанды. «Орта эсеп бла 5-6 миллиард сом керек боллукъду. Орта профессионал  билим берген 4 минг учреждениядан 1,5 минги жангыртылыргъа керекди»,-деп билдиргенди Васильев.

Владимир Путин бу башламчылыкъны тюзлюгюн белгилегенди эмда правительствогъа ол жаны бла буйрукъ берирге айтханды. Къыралны оноучусу жюрек-къан тамырланы аурууларындан къыйналгъанланы дарманла бла жалчытыугъа къошакъ ахча бёлюуню юсюнден башламчылыкъгъа да ыразылыгъын билдиргенди. Бу жумушлагъа уа 10 миллиард сом керекди. Аны хайырындан 32 минг адамны жашауун сакъларгъа онг боллукъду.

«Единая Россияны» КъМР-ни Парламентинде фракциясыны башчысы Михаил Афашагов   къыралны башчысы партияны патриот ишине уллу багъа бергенине ыразылыгъын билдиргенди.

- Тюбешиуде Владимир Путин партияны келечилери къыралда халкъланы тёрели культураларын сакълау жаны бла ишге уллу къошумчулукъ этгенин айтханды. Дагъыда Президентни Посланиясын жашауда бардырыугъа тийишли багъа бергенин да айтырчады,-дегенди фракцияны башчысы KABARDIN-BALKAR.ER.RU сайтны журналистине.