Электрокючню хайырын эмда хатасыны юсюнден дерс

«Россети Шимал Кавказ» компанияны бизни республикада бёлюмюню – «Каббалкэнергону» келечилери сабий тёлюге электрокючню, аны энчиликлерини, къоркъуусузлу хайырланыуну юсюнден дерслерин терк-терк бардыра туруучудула. Бу жол да кёп болмай аллай бирин Нальчикде орналгъан «Тейри къылыч» сабий-реабилитация арада ётдюргендиле. Анда солугъан гитче тёлюге Урван районда организациядан  электросетьлени келечилери келгендиле. Ала бла бирге уа Къабарты-Малкъар къырал аграр университетни «Предприятияланы энергия бла жалчытыу» факультетини экинчи курсунда окъугъан студентлени къаууму да.

Энергетикле сабийлеге электрокюч объектлени къатларында кеслерин къалай жюрютюрге кереклисин жик-жиги бла ангылатхандыла, юйде техниканы хайырланыу жорукълары бла да шагъырейлендиргендиле. Аны барын да айтханда, «къоркъуусузлу селфи» этиуню юсюнден толуракъ хапарлагъандыла. Сора, дагъыда жерге тюшюп тургъан ток чыбыкълагъа тийген угъай, къатларына жууукълашыргъа окъуна жарамагъанын ангылатхандыла. Студентле уа битеу бу айтылгъан затланы сабийле бла бирге назму халда къайтарып айтхандыла.

Ызы бла практикум башланнганды. Анда биринчи болушлукъ бериуюню юсюнден хапарлагъандыла, аны къалай этерге кереклисин да кёргюзтгендиле. Специалистле айтханларыча, болушлукъ терк берилсе, ток ургъан адамны жанын сакъларгъа амал барды. Реанимация жумушланы уа сабийлеге энчи манекенни юсюнде кёргюзтгендиле. Ала анга бек уллу сейир этип къарай эдиле. Кеслерин да къутхарыучуча сынап кёрюрге, манекенни «сау этерге» сюйгенле кёп болгъандыла.

Дерсни ол кезиую бошалгъандан сора, гитче тёлюге эсгертиу белгилени кёргюзтгендиле. Битеу айтылгъан затланы, жорукъланы ала къалай ангылагъанларын билир ючюн а конкурс эмда викторина бардыргъандыла. Ахырында сабийле энергетиклени юс кийимлерин, темирден ишленнген бёрклерин, энчи къол къапларын да кийип кёргендиле.