Биринчи классха – чырмаусуз

Энди ата-анала сабийни биринчи классха берирча «Госуслуги» порталда заявленияны алгъадан жазып къояллыкъдыла.  Аны энчи кабинетде  «черновик» халда сакълап приём башланнгынчы сакъларгъа жарайды. Кезиу жетсе уа, жаланда «Отправить» кнопканы басып жиберирге  боллукъду. 

Эсге сала айтсакъ, къыралда  мектеплеге приём биринчи апрельден башланады.   Заявленияны бир жолгъа бир къауум школгъа жиберирге  боллукъду, порталда  бош жерле табылсала  кёргюзтюлюп  туруллукъдула. 

Заявленияны берир ючюн: ата-ананы паспортларыны, сабийлени свидетельстволарыны,  регистрацияны данныйлерин,  школну номерин неда атын,  жаратхан школда ахлуларындан кимле  окъугъанларын эм льготалары бар  эсе, жазып  билдирирге керекди. Аланы оригиналларын а  школгъа  келтирирге тийишлиди.   

Сабийни юйню къатында неда эгечи, къарындашы баргъан школгъа  берирча 30 июньдан кеч къалмай   заявление жазылады.  Башха мектепге уа  6 июльдан  5 сентябрьге дери болжал салынады. 

Заявка бошалгъандан сора сабийни  школгъа алгъанлары   энчи кабинетде билдириледи.  Жашагъан жерлеринде болмай башха  районнга берирча  мектепде  бош жер табылыргъа керекди.