Ток ючюн тёлемегенледен къаты суралады

 «Россети Северный Кавказ» биригиуде  жыл башланнганлы  тёлемей борч этип тургъанланы  тинтирча эсепле чыгъаргъандыла.  Анга кёре, къышны эки айында окъуна  858 иск бла байламлы  254 миллион сом алыргъа онг табылгъанды. Андан сора да, сагъынылгъан кезиуде былтыргъы  659 иск бла   42,3 миллион  борч жыйылгъанды.   Саулай алып айтханда,  быйыл  январь-февраль айлада  Къабарты-Малкъарны  арбитраж сюдлери 811 искге къарагъанларындан сора    «Россети Северный Кавказ» биригиу   138 миллион сом ахча  тёлетдирилгенди. 

Хайырланыучуланы арасында аслам  борч этип тёлемей тургъанланы бирлерине «Нальчикская теплоснабжающая компания» бла  «Водоканал» биригиуле саналадыла. Бюгюнлюкде аланы эксини да  ток бла жалчытхан биригиуге - 39 эм 28 миллион сом берликлери барды.

Эсге сала айтсакъ, уллу кёллю абонентле  борчларын жапхандан сора да,  ишлерине сюдле къарагъанлары ючюн  ахшы  къоратыргъа тюшерикдиле.

 Сюд приставла къошулмай ангыламайдыла  

 «Россети Северный Кавказ» - «Каббалкэнерго» биригиу Сюд приставланы федерал службасыны КъМР-де управлениясы бла байламлыкъда  быйыл январь- февраль айда  абонентлени бар тюрлюсюнден да  6,8 миллион сом ёнкюч алгъанды.  Ол кезиуде  160-гъа жууукъ инсанны мюлкюне, счётларына эм кассаларына да  25,2 миллион сом араест салыннганды.

Бусагъатда уллу борчлары болгъанладан бирине «Эко-Сервис» биригиу  да саналады. Быйыл  аны счётунда ахча алынып  турурча мадар этилгенди. Ол  тийишли халда толтурулмаса уголовный жууапха тартылыргъа боллугъу да  билдиргенди.  Предприятияны биринчи мартха борчу  3,2 миллион сомгъа жетеди.

Законодательствогъа кёре, борчу болгъан иши сюдге берилмезча  беш кюнню ичинде аны  жабаргъа керекди.  Сюд приставланы билдириулерине уллу кёллюлюк этгенле уа тазир тёлерге тюшерикдиле. Ол санда энчи адам    минг сом эм организация он минг сом тазир тёлерча  постановление бериледи.   Аны бла бирге банкда счётларына, кассаларына, айлыкъларына, тепген эм тепмеген мюлклерине  арест салыныргъа боллукъду. Аллай къайгъыладан къутулурча   «Россети Северный Кавказ» биригиу ток ючюн заманында эм толусунлай тёлерге кюреширге  чакъырады. 

Токну урлагъанла къутулалмагъандыла 

 Кёп болмай «Россети Северный Кавказ» – «Каббалкэнерго» биригиуню специалистлери Чегем районда элледен бирлеринде аслам  ток урланнганын тинтгендиле. 

Рейдлени кезиуюнде энергетикле агъач цехде токну эсеплеген приборну ишине чырмау салыннганын   ачыкълагъандыла. Анга кёре хайырланыучу 2,2 миллион сом багъасына 340,4 мингден артыкъ кВт сагъат урлагъанды.  Аны бла байламлы акт ич ишлени келечилерине барилгенди.

 Эсге сала айтсакъ, энергокючню  урлагъан  уллу хата гъа келтирирге боллукъду. Кеслери араларына къалай болсада тартылгъан  ток чыбыкъла   ёртеннге келтирирге, адамны саулугъуна хата салыргъа эм  къыйыры къоншулагъа окъуна жетерге боллукъду.

Алай бла токну урлагъанла Административ бузукъланы кодексини 7.19-чу статьясына тийишлиликде (Сетьлеге эркинликсиз къошулгъанларына эм токну эсеплеген приборсуз хайырланнганларына) тазир тёлерикдиле. Аны ёлчеми энчи иелилеге - 10-15 минг эм организациялагъа уа 100-200 минг сомгъа жетеди. Андан сора да, бир-бир аманлыкъчыла РФ-ны Уголовный кодексини 165-чи статьясына кёре, эки жылгъа тутулургъа да боллукъдула.