Ышандырып, алтын затларын урлагъанды

Былтыр ноябрьде РФ-ни МВД-сыны Элбрус районда бёлюмюне 39-жыллыкъ тиширыу тарыгъып келгенди. Аны айтханына кёре, ол Интернетде эр киши бла танышханды, ол атына Руслан  дегенди. Аны бла тюбешгенден сора уа  алтын затлары тас болгъандыла -100 минг сом багъасы.

Оператив жумушла толтуруп,  уголовный розыскны полициячылары  аманлыкъны этгенине ишеклини тохташдыргъандыла. Ол башы алгъын да бир ненча кере сюдлюк болгъан 38-жыллыкъ аргуданчыды. Ол айтханыча, тиширыу бла танышып,  аны бла Нальчикде вокзалда тюбеширге келишеди. Ушакъны кезиуюнде, тиширыу сакълыгъын тас этгенин кёрюп, аны сумкасындан алтынланы урлагъанды. 

Бюгюнлюкде уа эр киши Ставропольда башха аманлыкъ этгени ючюн изоляторда тутулуп турады. 

Хыйлачы миллион сом къоллу болгъанды

Быйыл 12 июльда Чегем районну ОМВД-сыны дежурный бёлюмюне 44-жыллыкъ эр киши келгенди. Ол ангылатханыча, аны телефонуна бир белгисиз адам сёлешип, банкны къоркъуусузлукъ  бёлюмюню келечиси болгъанын айтханды. 

Ушакъны кезиуюнде ол чегемлини алдап, банк карта бютюнда къоркъуусуз болур ючюн телефоннга энчи программа салыргъа керекди дегенди. Эр киши анга тынгылагъанды, алай программа ишлеп башлагъанлай, аны счётундан 995 минг сом тас болгъанды. 

Хыйлачылыкъ бла байламлы уголовный иш ачылгъанды. Полициячыла аманлыкъчыны тохташдырыу жаны бла тийишли мадарда толтурадыла.

Республиканы хурметли жамауаты. Банк картагъызны шартларын, аны жашырын номерин бир адамгъа да айтмагъыз! Картадан кюнню ичинде къаллай бир ахча къоратыргъа жарагъанына чек салыгъыз, алай бла аманлыкъчы андан кёпню  къолгъа эталлыкъ тюйюлдюле.  

Асламында быллай хыйлачылыкъла уллу кёллюлюкню, танымагъан адамгъа ышаныулукъну хатасындан болуучудула. Аны ючюн полициячыла сакъ болуругъузну тилейдиле.

Ана къыйын жашау болумгъа тюшгенин сылтаугъа алгъанды

РФ-ни Следствие комитетини КъМР-де следствие управлениясыны келечилери Май райондан тиширыугъа ачылгъан уголовный ишни тинтип бошагъандыла.  Ол РФ-ни УК-сыны 106-чы статьясына кёре терсленнгенди, башхача айтханда, анасы къагъанакъ баласын ёлтюргенине ишеклик барды. 

Материалда болгъан шартлагъа кёре, быйыл 29 апрельде тиширыу сабийден къутулур заманнга жетгенине да къарамай, медицина учреждениягъа болушлукъ алыргъа бармагъанды. Анга саулукълу жашчыкъ туугъанды. Алай тиширыу къыйын жашау болумгъа тюшгенин сылтаугъа алып, аны ёсдюрюр акъыл да  этмегенди.   Алай бла ол къагъанакъны полимер артмакъгъа чулгъап, балконнга салгъанды.

Бир ненча кюнден а тиширыу аурукъсунуп больницагъа баргъанды. Анда ол врачлагъа баладан къутулгъанын, аны ёлтюргенин айтханды. 

Уголовный иш сюдню къараууна берилгенди.

Бир кюнне килограмм наркотик сыйырылгъанды

Прохладна районну  Черниговское элинде патруль-пост службаны полициячылары орамда эр кишиге ишекли болгъандыла. Аны къолунда артмагъы бар эди. Аны ичинде кеси тюрлю ийиси бла кырдык бар эди. Экспертиза ол марихуана болгъанын кёргюзтгенди, аны ауурлугъу 176,1 граммгъа жетеди. 

Зольск районда уа Дугулубгейден 37-жыллыкъ эр кишиден право низамны сакълаучула 728,7 грамм уулу кырдык сыйыргъандыла. Ол да марихуана болгъаны тохташдырылгъанды. Заюковода уа РФ-ни МВД-сыны «Баксанский» муниципалитетле аралы бёлюмюню полициячылары 35-жыллыкъ эр кишиде 208,1 грамм  уулу кырдык тапхандыла.

Алай бла бир кюнню ичинде право низамны сакълаучула 1112,9 грамм наркотик сыйыргъандыла. Ишеклиле барысы да аны кеслерине ичерге сакълагъанларын айтхандыла. Битеу шартла бла байламлы уголовный ишле ачылгъандыла.