Умуту – героинни сатаргъа эди

Къабарты-Малкъарда Чегем районда полициячыла законсуз наркотиклени сатыу-алыу бла кюрешген адамны тутхандыла.

Оператив-излеу ишлени кезиуюнде КъМР-де МВД-ны наркотиклени законсуз сатыу-алыугъа къажау кюрешген органланы къуллукъчулары КъМР-де ФСБ-ны управлениясыны ишчилери бла бирге «Гром» энчи отрядны болушлугъу бла автовокзалда посылка ала тургъанлай 29-жыллыкъ тыш къыралны келечиси тутулгъанды.  

Посылканы тинтген кезиуде аны ичинде акъ тюрсюнлю порошок бла электрон базманны тапхандыла. Аманлыкъчы ангылатханыча, аны наркотиклени республикада закладкала этип жаяргъа умуту бар эди. Этилген экспертизагъа кёре, сыйырылгъан вещество 406,52 грамм чакълы бир «героин» болгъанды.

МВД-ны Чегем районуну бёлюмюнде эр кишиге РФ-ни Уголовный кодексини 228.1-чи статьясыны 4-чю (Уллу ёлчемде наркотиклени законсуз сатыу-алыу) кесегине тийишлиликде уголовный иш ачылгъанды, деп бидиредиле КъМР-де МВД-ны пресс-службасындан.