Илляула ичинде - наркотикле

Къабарты-Малкъарны наркотиклени законсуз сатыу-алыу жаны бла кюрешген управлениясыны къуллукъчулары  оператив-излеу ишлени кезиуюнде Нальчикде Идаров атлы орамда  тыш къыралдан эр кишини тутхандыла. 27-жыллыкъ жаш элтип бара тургъан сабий илляуланы ортасында оперативникле къара тюрсюнлю изолента бла чулгъаннган 300 хуржун табып сыйыргъандыла. Анда уа акъ тюрсюнлю порошок бар эди. Аманлыкъчы хуржунлада уулу вещество болгъанын эмда аланы республикада закладкала этип жаяр мураты болгъанын айтханды. Наркотиклени уа таныш болмагъан адамадан, социал сетьле бла хайырланып, алгъанын билдиргенди.

Этилген экспертизагъа кёре, сыйырылгъан уулу веществону ауурлугъу 233.84 грамм чакълы эди.

Уголовный кодекс бла аманлыкъчыгъа 228.1 статьяны 4 кесеги бла эм 30 статьяны 3 «г» кесеги бла  терслеу иш ачылгъанды. (Уллу ёлчемде законсуз наркотиклени сатыу бла кюреширге мурат), деп билдиредиле КъМР-да МВД-ны пресс службасындан.