Халкъ программагъа тюзетиуле хазырланнгандыла

«Единая Россияны» халкъ  программасына «Жангы жерлени айнытыу» бёлюм кийирилгенди. Документ партияны программа комиссиясыны жыйылыуунда ачыкъ этилгенди. Кенгешни партияны башчысы Дмитрий Медведев бардыргъанды. Программагъа хазырланнган тюзетиулени партияны генсоветини башчысы Андрей Турчак  эмда аны бёлюмлерин жашауда бардырыугъа жууаплыла бла министерстволаны келечилери кёргюзтгендиле.

Дмитрий Медведев «Единая Россия»  къыралгъа къыйын кезиуде инсанланы аллында борчланы унутмагъанын  чертгенди. «Партия толтуруучу власть органла бла байламлыкъла къурагъаныны хайырындан, быйылны бюджетине пограмманы толтурургъа ахча салыннганды. Социал борчла, экономикагъа инвестицияла салыу жумушла къытлыкъны кезиуюнде толтурулгъанларын барыбыз да кёребиз. Болсада партия бойнуна алгъан борчланы барысын да тамамлайды»,-дегенди ол.

  Дмитрий Медведев айтханыча, былтыр партияны халкъ программасы жангы регионлада сингдирилип башлагъанды. Аланы айнытыугъа бурулгъан жангы бёлюмню    хазырлагъан ишчи къауумгъа башчылыкъны Андрей Турчак этгенди.  Ол къыралны жангы регионларында билим бериу, саулукъ  сакълау, социал жумушла  тамамлау жаны бла жорукъла сингдирилгенлерин чертгенди. 

   Программагъа  башха тюзетиуле да хазырланнгандыла. Ол санда анга колледжлени бла техникумланы тынгылы жангыртыуну мадарлары белгиленгендиле. Жарыкъландырыу министерство бла бирге   учрежденияланы болумлары  сюзюллюкдю. Аланы жангыртыугъа ахча 2024-2026 жылланы бюджетине салынырыкъды.

Дагъыда регионлада коммунал ызланы жангыртыргъа кереклисине эс бургъанды Андрей Турчак айтханыча, партияны башламчылыгъы бла бу жумушлагъа ахча бёлюннгенди.

-  Саулукъ сакълауда тыш къыраллы товарланы кеси продукция бла алышындырыу програманы къабыл кёрюрге белгиленеди: медицина оборудованияны, дарманланы кесибизде чыгъарыргъа керекди. Саулукъ сакълау эм Промышленность министерствола бла   сёлешиуле барадыла,-дегенди генсоветни секретары.

Программагъа  кёп къатлы юйледе лифтлени жангыртыу жумушланы кийирирге предложение этилгенди. Дагъыда   школланы тынгылы жаныртыу программаны чеклеринде регионлагъа бюджет ахчаны билим бериу учрежденияланы тийрелерин жангыртыугъа,  стадионла эмда спорт майданла ишлетиуге   къоратыргъа эркинлик бериуню соруулары да сюзюлгендиле. 

Туризмни соруулары да сюзюлгендиле. Андрей Турчак программа хазырланнган   кезиуде инсанладан ата журтлу къонакъбайлыкъ сферагъа сейир уллу болгъаны ачыкъланнганын айтханды. Аны эсге алып, Экономиканы айнытыу министерство бла бирге партияны халкъ программасына ата журтлу туризмни айнытыу жаны бла жангы бёлюм къураргъа предложение этилгенди.

 «Жангы жерлени айнытыу» программаны жашауда бардырыугъа  партияны жандауурлукъ иш жаны бла штабыны таматасы Анна Кузнецова жууаплы болгъанды. Ол билдиргенича, анда 30-дан аслам башламчылыкъ барды. Ол санда инфраструктураны бла экономиканы тапландырыу жумушла кийирилгендиле.

-Биз жангы регионлагъа терк-терк барыучубуз. Шёндю Мариуполь къалай тапландырыла тургъанын кёребиз. Халкъ программагъа жашау журтланы, социал объектлени жангыртыу жумушла кирирге тийишлидиле. Дагъыда тапландырыу иш бардырылгъан кезиуде токга льготалы багъала тохташдырыу, предпринимательлеге, эл мюлк бла кюрешгенлеге себеплик, транспортну айнытыу мадарла да керекдиле,-дегенди ол.

 Кенгешни ахырында Дмитрий Медведев партияны халкъ программасы былтыр къалай толтурулгъаныны эсеплерин чыгъарып, РФ-ни Президентине доклад хазырларгъа буйрукъ бергенди. Ол айтханыча, былтыр белгиленнген жумушланы 92 проценти ахырына жетдирилгенди.

Эсигизге салайыкъ, «Единая Россияны» халкъ программасында 294 бёлюм барды, ол 2021-2025 жыллада тамамланыллыкъды. Аны жарашдырыугъа къыралны 2,5 миллиондан аслам инсаны къатышхандыла. Аланы кемчиликлерини юслеринден интернетде билдирирге, неда Къырал Думагъа кандидатла бла тюбешиуледе айтыргъа онглары болгъанды.

Партияны КъМР-де регион бёлюмюню толтуруучу комитетини башчысы, КъМР-ни Парламентини депутаты Дмитрий Парафиловну айтханына кёре,    халкъ программа  кенгди, ол республикада планнга тийишлиликде тамамланады.

- Партияны Парламентде фракциясы бюджетни къурагъан кезиуде социал   соруулагъа энчи магъана береди. Аны чеклеринде школлада тынгылы жангыртыу жумушла бардырылгъандыла. Аладан онтёртюсю битдирилгенди, алтысы ахырына жетдириле турады. Былтыр Нальчикде Жаш къараучуну театры жангыртылгъанды, элледе маданият юйлени тапландырыу жумушла бошала турадыла. Шахарны ичинде поликлиникала, районлада ара больницаланы поликлиника бёлюмлери тапландырыладыла, амбулаторияла ишлетиледиле, шахарда сабий поликлиникада жангыртыу ишле ахырына жетдириледиле. Элледе амбулаторияланы кереклерине 41 машина сатып алыннганды. «Къоркъуусуз эм качестволу жолла» программа кесини хайырлылыгъын кёргюзтгенди. Аны болушлугъу бла республикада жолланы 170 километри тап халгъа келтирилгенди. Битеу да бирге жюзден аслам объект тамамланнганды,-дегенди Дмитрий Парафилов KABARDIN-BALKAR.ER.RU сайтны журналистлерине партияны халкъ программасы КъМР-де къалай толтурулгъаныны юсюнден.