Къысха заманнга аслам соруугъа къаралгъанды

Къабарты-Малкъарны Регионнга оноу этиу арасы (ЦУР)  озгъан ыйыкъда  беш жюзден аслам соруугъа къарагъанды. Аланы асламысы «Telegram», «Одноклассники, «ВКонтакте» социал сетьледе кётюрюлген «Инцидент менеджмент» системаны амалы бла жарашдырылгъан проблемаладыла.  

Сагъынылгъан сорууланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, саулукъ сакълау эм башха соруула бла байламлыдыла. Аланы хар бирине  специалистле тынгылы къарап, профильлерине кёре тийишли ведомстволагъа билдиредиле.

Айтылгъан кезиуде араны специалистле жууаплы ведомствола бла бирге Бахсан шахар округда  орамда суу быргъыны атылгъаны бла байламлы бузукълукъну кетергендиле. Аны хайыры бла  эки жюзден арбазны  таза суу бла жалчытыргъа онг табылгъанды.  Тырныауузда  Мусука, Мызы эм Мичурин орамлада, Экинчи Чегем эм Дейское элледе да  жашау журтланы таза суу  бла сылтаусуз этгендиле.   Прохладна уа жыйырма кубометр чакълы  эркинликсиз  зыбыр къалгъан-къулгъанла тёгюлген жер къурутулгъанды.  

Алгъа заманда жууап берилирча бир сагъат сакъларгъа тюшгени кёплеге тап болмагъанды. Энди уа, орта эсеп бла алып айтханда, жыйырма беш минутдан кёпге созулмагъаны ишни бютюн жетишимли бардырыргъа онг тапдырады.  

Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа  эс бурурча ол социал сетьлени биринде жазылыргъа керекди. Ол санда проблема тынгылылыракъ ачыкъланса игиди.