Ток урлагъан предприятие жууапха тартыллыкъды

«Россети Шимал Кавказ» компания Нальчикде къадар ток урланнган шарт ачыкълагъанды. Андан билдиргенлерине кёре, санатор-курорт сферада ишлеген предприятияладан биринде талай айны ичинде электрокючню счётчик бла эсеплемей хайырланып тургъандыла. Тергеулеге кёре алай бла 1,1 миллиондан аслам киловатт урланнганды. Аны багъасы уа 7,4 миллион сомгъа жетеди.

Компанияда айтханларыча, ол предприятие токну законлу халда хайырланса, аны ючюн энди берлигинден эсе аз ахча къоратып къутуллукъ эди. Энди уа энергетикле материалланы жыйышдырып, правону къоруулаучу органлагъа ашыргъанлары себепли бу абонентни уголовный жууаплылыкъ сакълайды.

Электрокючню урлау административ неда уголовный жууаплылыкъгъа келтирлигин къайтарып эсгередиле «Россети Шимал Кавказ» компанияда. КоАП-ны 7.19 статьясына тийишлиликде, ток ызлагъа эркинлик берилмей къошулгъан неда электрокючню эсеплемей хайырланнган гражданланы 10-15, предприятияланы бла организацияланы уа 100-200 минг сом тазир сакълайды. Иш уллугъа кетип, бузукълукъ да уголовный Кодексге тийишли болса, инсаннга эки жыл окъуна берирге боллукъдула.

Токну урлау къоркъуулу ишди, деп эсгередиле энергетикле. Чыпынлагъа ёрлеген неда электрокюч баргъан чыбыкълагъа тийген инсан кесини саулугъуна, жашаууна да игилик келтирлик тюйюлдю.