Алыучуну жумушуна тынгылы къарагъандыла

Роспотребнадзорну Къабарты-Малкъарда управлениясына Россей Федерацияны Президентини Приёмныйинден къагъыт келгенди. Анда ким эсе да биреу тарыгъа болгъанды. Айтханына кёре, ол тюкенден 26 минг сомгъа диван сатып алгъанды. Ахчаны уа анга «ХКФ Банк» кредитге бергенди.

Диванны юйюне келтиргенлеринде, ол отоугъа келишмегенин кёрюп, бу адам сатыу-алыу келишимни жабыгъыз деп тилегенди. Тюкен аны терк этсе эди, кредитни юсю бла къошакъ тёлеу бермей къутуллукъ эди ол адам. Иш къалай болгъан эсе да, ахыры уа Президентни Приёмныйине келгенди.

Роспотребнадзорда айтханларына кёре, «Хайырланыучуланы эркинликлерин къоруулауну юсюнден» законну 25 статьясына тийишлиликде, адам продовольствие болмагъан товар алып, ол а анга уллулугъу, тюрсюню, формасы неда башха ышанлары бла келишмей къалгъан эсе, аны тюкеннге тюз алгъаныча ол халда къайтарып, башхасына алышыргъа, неда къоюп, ахчасын да алып кетерге эркинди. Тёлеген сомларын алыргъа сюйюп къагъыт жазып берсе, аны ол товарны къайтаргъанындан сора юч кюнню ичинде дурус кёрюрге борчлудула.

Бу жорукъла кредитге алыннган товарлагъа да тийишлидиле. Тюкен да банкны ахчасын кесине кёчюрюрге керекди. Аны бла кредит кючюн тас этеди.

Алай бла ведомство къатышхандан сора, диванны сатхан тюкенни иеси ишни сюдге да жетдире турмай, ол адамны жумушун законнга тийишлиликде тындыргъанды.

Хурметли жамауат! Сиз кесигизни хайырланыучу жаны бла эркинликлеригизге бузукълукъ этилгенди дей эсегиз - Роспотребнадзоргъа билдиригиз. Анга деп Управленияны сайтында форма барды. Сюйсегиз а ведомствону кесине барып айтыгъыз. Аны адреси: Нальчик ш., Кешоков атлы орам, 96.