Танг кесек соруугъа къаралгъанды

Къабарты-Малкъарны Регионнга оноу этиу арасы (ЦУР) ай башланнганлы тогъуз жюзден аслам соруугъа къарагъанды. Аланы асламысы «Telegram», «Однаклассники, «ВКонтакте» социал сетьледе кётюрюлген «Инцидент Менеджмент» системаны амалы бла жарашдырылгъан проблемаладыла.  

Сагъынылгъан сорууланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, саулукъ сакълау эм башха соруула бла байламлыдыла. Аланы хар бирине  специалистле тынгылы къарап, профильлерине кёре тийишли ведомстволагъа билдиредиле.

Алгъа заманда жууап берилирча бир сагъат сакъларгъа тюшгени кёплеге тап болмагъанды. Энди уа, орта эсеп бла алып айтханда, жыйырма беш минутдан кёпге созулмагъаны ишни бютюн жетишимли бардырыргъа онг тапдырады.  

Он кюнню ичинде специалистле жууаплы ведомствола бла бирге Шалушка бла Огъары Курпда 1,5 адамны таза суу бла жалчытырча мадар этгендиле. Аны бла бирге Куба бла Псыхурейде да орамланы кече жарытырча проблема тамамланнганды. Дагъыда Тырныаууз бла Бахсанда юйлеге жылыу келирча жумушха къаралгъанды эм Прохладныйде  онеки кубометр чакълы эркинликсиз тёгюлген кир-кипчик да къурутулгъанды.

ЦУР «жарсытхан соруула» рубриканы чеклеринде КъМР-ни культура министри Мухадин Кумахов эм саулукъ сакълау министрини орунбасары Марат Кармов бла да тюзюнлей эфир бардыргъанды. Аны чеклеринде тюзюнлей халда жамауат соруула да бергендиле.  

Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа  эс бурурча ол социал сетьлени биринде жазылыргъа керекди. Ол санда проблема тынгылылыракъ ачыкъланса игиди.