Къышда жолла къоркъуусуз болурча

Автомашина жоллагъа къарагъан «Кавказ» управленияны ишчилери Къабарты-Малкъарда федерал трассала къоркъуусуз болурча дайым эс бургъанлай, тийишли жумушланы тамамлагъанлай турадыла.  

Ишлени кезиуюнде машина жолланы, тротуарланы, улоула тохтагъан комплекслени, къоркъуусузлукъну жалчытхан бурууланы, светофорланы, белгилени эмда башха жерлени къардан тазалайдыла, бузну эритирча юзмез къатыш туз чачадыла. Бютюнда бек «Элбрус» тау-лыжа курортха баргъан «Прохладный – Баксан – Элбрус» А-158 эм «Урван – Огъары Малкъар – Уштулу» А-154 трассалагъа сакъ болургъа тюшеди.

Быйыл жолда бузкъауданнга чачарча 17 минг тонна юзмез бла туз къатыш материал хазыр этилгенди. Бек сууукълада уа эки тенгинден бири туздан къуралгъан ПГМ чачдырылады. Тийишли материал керек жерге оператив халда тапдырылырча республикада алты база ишлейди. Аны бла бирге жолчула бла энчи техникагъа он жылы пункт жарашдырылгъанды.

Ведомстводан билдиргенлерича, бюгюнлюкде жоллада элли эки энчи техника хайырланылады. Ол санда тюрлю-тюрлю ишге жарагъан 31 машина, 12 экскаватор, 12 погрузчик, 7 автогрейдер эм 2 бульдозер. Жол техникала борчларын тийишли халда толтурурча ала ГЛОНАСС системаны мурдорунда «Дортранснавигация» навигация-диспетчер системагъа къошулгъандыла. Аны амалтын дайым контроль этилгенлей турады. Андан сора да, управление ГИБДД-ны, МЧС-ини, Гидрометеорология араны бёлюмлери бла байламлыкъда къуралгъанды. Метеорология бёлюмню келечилери да жоллада халгъа, хауаны болумуна къарагъанлай турадыла.

Управленияда жолланы буз басхан кезиуде водительлеге энчи сакъ болургъа, къызынмазгъа эм дистанцияны сакъларгъа чакъырадыла. Жолда бир тюрлю тыйгъыч неда бузукълукъ эслеселе, бу номер бла диспетчер службагъа сёлешип билдирирлерин тилейдиле: 88793 33-11-59.