Къысха заманда абонентле ток бла жалчытылыннгандыла

Бу кюнледе Къабарты-Малкъаргъа къаты сууукъла келгенлери ючюн,  буз басып ток чыбыкъланы юзгенди эм саулай   энергокюч системаны да уллу ауурлукъ бла ишлерча этгенди.  Аны амалтын  Бахсан эм Зольс районлада онжети эл,  неда 53 мингден аслам адам токсуз къалгъандыла.  Аварияланы къысха заманда кетерирча   «Россети Северный Кавказ» биригиуню таматасы Виктор Абаимов  къошакъ халда къоншу регионладан бригадаланы чакъыртханды. 

Ол айтханнга кёре, абонетле,  ол санда  токсуз къалгъан медицина учрежденияла бла башха социал магъаналы объектле  оператив халда ток бла жалчытылынырча тийишли мадар этилгенди.  Аны бла бирге къыйын хауа болумну сакъланнганы  себепли  болумну дайым контрольда тутаргъа борчлуду. 

Бу кюнледе  Чеченден бла Ставропольдан  сегизишер эм Ингушетиядан тёрт адам келгендиле. Ары дери да  Шимал Осетиядан бла Къарачай-Черкесден энергетикле  болушургъа жетгендиле. Ала кече-кюн демей къармашханларыны  хайырындан   бюгюнлюкде Хушто-Сыртда, Тёбен-Чегемде  эм башха  бир къауум  элде  бузукълукъланы кетерирге онг табылгъанды. 

Саулай алып айтханда, бусагъатда энергообъектледе 28 бригада, неда 119 специалист  эм 46 чакълы энчи техника ишлейдиле. 

Эсге сала айтсакъ, электрокюч бла байламлы бузукълукъ чыкъса - ток  чыбыкъ юзюлсе неда электрокюч объект сынса,  кече-кюн демей,  хакъсыз  бу  телефон номерге сёлешип билдирирге боллукъду:   8-800-220-0-220.