Жангылып, борч жазылгъан эсе

Бирде атлары, тукъумлары, аталарыны атлары окъуна бирча инсанла тюбейдиле. Быллай кезиуде уа бирини борчу башхасына жазылыргъа боллукъду.

Быллай чырмаула болмаз ючюн а, Госуслуги порталда жангы мадарла къуралгъандыла. Жангылып, башха адамны борчу жазылгъан инсан  «Сюд приставланы федерал службасына тилек» деген бёлюмню онглары бла хайырланыргъа боллукъду. Анда «Толтуруу бегимде сиз кимсиз» деген бёлюмде «Манга башха адамны борчу жазылгъанды. Аны дауларгъа сюеме» деген сорууну сайларгъа керекди.

 Заявленияда толтуруу бегимни номерин жазаргъа керекди эмда борчунг болмагъаныны юсюнден шартланы да билдирирге тийишлиди. Ызы бла документле сюд приставлагъа жиберилликдиле.

 Андан сора да Сюд приславланы федерал службасыны КъМР-де Управлениясыны сайтында «Интернет-приёмная» бёлюмде да толтурургъа боллукъду бу жумушну. Анда уа «Я двойник» деген сорууну   сайларгъа боллукъду. Сайтны болушлугъу бла берилген тилекге жууап эки  кюнню ичинде хазырланады.  Паспортну, СНИЛС-ни, ИНН-ни  копияларын тинтип, пристав,   инсанны борчу жокъ эсе, битеу салыннган чеклени кетерликди.

 Жангылып, адамны банк картасындан неда айлыгъындан ахча тыйылгъан эсе, ол да толусунлай артха къайтарыллыкъды.