Жашау журтларын тас этгенлеге социал болушлукъну низамы алышыннганды

Табийгъат эм техноген аварияны хатасындан бузулгъан жашау журтну тынгылы жангыртыугъа компенсацияны ёлчеми кёбейтилгенди.

КъМР-ни прокуроруну тамата болушлукъчусу Сотталаны Жаннаны бизге ангылатханына кёре, РФ-ни Правительствосу быйыл 26 июльда чыгъаргъан 1328-чи бегими бла федерал бюджетден бюджетле аралы трансфертлени юлешиуню низамы тюрлендирилгенди. Сёз РФ-ни Правительствосуну резерв фондундан РФ-ни субъектлерине къырал власть органланы полномочияларын толтуруугъа ахча юлешиуню юсюнден барады. Ол санда табийгъат эм техноген болумланы хатасындан жашау журтларын тас этген инсанлагъа социал болушлукъну низамы да белгиленнгенди. Документде жазылгъаныча, терактны кезиуюнде неда аны тохтатханда, инсанны юйю бузулса да этилликдиле аллай тёлеуле.

- Алгъын бузулгъан мекямны жангыртыугъа бир квадрат метрге 6 минг сом тёлене эди, энди уа аны ёлчеми минг сомгъа кёбейтилгенди. Анга кёре регионлагъа бёлюннген трансфертле да ёсгендиле, - деп чертгенди Сотталаны Жанна.

Андан сора да, ахчаны бёлюуню низамы да алышыннганды. Федерал эм регионла аралы хатаны кезиуюнде терактда (ол тохтатылгъанда) тас этген эсе инсан ырысхысын, къоранчла толусунлай къайтарыллыкъдыла. Авария регионда болса, ахча субъектни финанс болумуна кёре берилликликди.