Муниципал жолла тапландырыладыла

Къабарты-Малкъарда «Къоркъуусуз эм качестволу автомобиль жолла» миллет проет жетишимли бардырылады. Ол себепден арт жыллада  жолла жангы излемлеге  келишгенлерин да эслерге боллукъду.  Быллай мадарны хайыры бла элледе жашагъанла  жунчумазча этерге эм  аварияланы санын да азайтыргъа онг табылгъанды. 

Арт жыллада  республикада 56 элде 225 километр регион магъаналы  жолгъа тынгылы ремонт  этилгенди. Быйыл да 60 километр чакълы бирде 18 жол жангыртыллыкъды. Алай бла кёп болмай 15,5 километр чакълы бирде    «Залукокоаже – Зольское – Белокаменское» участок хазыр болгъанды. Ол  Светловодское, Октябрьское, Шордаково  эм Белокаменское эллени, район арадан сора да,  «Кавказ» Р-217 трасса бла байлайды.  Энди Зольск районда жашагъанла администрация, амбулатория, школ, сабий сад, Маданият юй дегенча социал магъаналы учреждениялагъа эм Нальчикге да къыйналмай жеталлыкъдыла.  

Былтыр «Регион, муниципал эм жер-жерли магъаналы автомобиль жолланы айнытыугъа себеплик этиу» программаны чеклеринде федерал бюджетден бёлюннген ахчагъа  «Прохладный – Эльхотово» жолну  9,5 километрине тынгылы ремонт этилгенди. Ол  Май бла Прохладна районланы байлагъан республикалы магъаналы жолду. Аны бла бирге аны  Ставрополь крайгъа, Шимал Осетиягъа, Ингушетиягъа эм башха субъектлеге  баргъанла да терк-терк хайырланадыла. Бир суткагъа былайтын 14 минг тюрлю-тюрлю машина  жюрюйдю.

Алай бла  федерал эм регионал жолчуланы байламлыкъда ишлегенлерини  хайырындан мындан арысында да эл жерледе жолланы игилендирча иш тири бардырыллыкъды.  Ол шарт республиканы экономикасын айнытыугъа ахшы къошумчулукъ этериги да баямды.