Халкъ жырланы ариу байрамлары – къууанчлы халда

Къабарты-Малкъар Республиканы къуралыууну 100-жыллыгъын эм Россей Федерацияны халкъларыны маданият хазналарыны жылын белгилеуню чеклеринде бу кюнледе буруннгу халкъ жырланы «Мени Ата журтум – мени жырым» деген фестивальлары озгъандыла. Ала эки белгили жырчы Зарамук Кардангушевни эм Отарланы Омарны атлары бла бардырылгъандыла, къураучулары КъМР-ни Маданият министерствосуду.

Къабарты-Малкъар Республиканы битеу районларындан эм шахарларындан 8 жылларындан 15 жылларына дери 55-ден артыкъ сабий бу фестивальгъа биринчи кере къатышхандыла. Али Шогенцуков атлы Къабарты къырал драма театрны эм Къулийланы Къайсын атлы Малкъар къырал драма театрны сахнасындан 50-ден артыкъ эрттегили халкъ жыр эшитилгенди. Фестивальгъа къатышханланы барысына да къураучула эсде къаллыкъ дипломла эм саугъала бергендиле.

Проектни чеклеринде, миллет тёрелени сакълаугъа уллу къыйын салгъаны ючюн, деп КъМР-ни Маданият министерствосу эки энчи диплом къурагъанды. Ала айтхылыкъ Зарамук Кардангушевни бла Отарланы Омарны ахшы тёрелерин шёндю бардыргъанла буруннгу халкъ адыг жырланы айтхан КъМР-ни халкъ артисти Черим Нахушевни эм буруннгу малкъар жырланы айтхан КъМР-ни халкъ артисти Газаланы Алимни атлары бла белгиленедиле.

Ёсюп келген тёлюню кесини ёз маданияты бла тин байламлыгъы бек магъанлыды. Быллай байрамланы хайырындан халкъ жыр хазнабыз тёлюден тёлюге ётеди, алай сакъланадыла эм кёбейедиле магъаналары уллу болгъан къыйматла. Алгъыннгы тёлюлени тёрелерин эм жетишимлерин жангыдан тиргизе, биз тамблагъы кюннге тийишли тап жол къурайбыз.