Жангыртылгъан жолла - ахшы муратла

Къабарты-Малкъарда «Качестволу эм къоркъуусуз автомобиль  жолла» миллет проектге кёре ишле къыстау барадыла. Аны чеклеринде  арт жыллада иги кесек  объектни игилендирирге онг табылгъанды.  Ол  экономиканы айнытыргъа себеплик этгенден сора да, регионну да  бетин кёргюзтеди.  Аслам  турист жокълагъан  республикагъа уа ол бютюн магъаналыды. 

Алай бла 2017 жылда 1,8 миллиард сом багъасына 20 объект неда 46 километр чакълы жол  мардалагъа келиширча этилгенди.  Аны бла бирге «Къоркъуусуз эм качестволу автомобиль жолла»  миллет проектге кёре,  2019 жылда  2,9 миллиард сомгъа  100 аслам километр чакълы бирде   66 объект  тапландырылгъанды.  Сагъынылгъан жыллада ишле графикден кеч къалмай  тамамланнганлары  Къабарты-Малкъар  уллу объёмлагъа хазыр болгъанын кёргюзтгенди.  Анга кёре, быйыл жоллагъа тынгылы ремонт этилирча регионнга  4 миллиард сом берилгенди. Ол ахчагъа   120 объект неда 170 километрден  артыкъ  жол жангыртылыргъа тийишлиди.  

Арт жыллада тынгылы ремонт ишлеге аслам ахча берилгенини хайырындан   жангы подряд организацияланы, тийишли материалла чыгъаргъан предприятияланы къураргъа эм энчи техника къоллу болургъа онг табылгъанды. Аны  себепли быйыл жолланы ишлерге  жыйырмадан артыкъ подряд организация къатышханды. Ол шарт уллу объёмланы графикден кеч къалмай бошаргъа онг берликди. 

Аладан бири «Дорремстрой-1» биригиу жоллагъа ремонт этиу бла онбеш жыл кюрешеди. Былтыр ол 719 миллион сом багъасына беш объектни жангыртханды. Ол санда  «Чегем II-Булунгу» жолну.  «Урванское ДРСУ» да  эрттеден бери ишлеген, кючлю производство мурдору болгъан биригиудю.   Ол дайым  энчи техникасын бла  оборудованиясын жангыртырча мадар этеди. Аны эки асфальт этген заводу эм керек материалла   хазырлагъан комплекси да барды. Быйыл ол 611 миллион сом багъасына беш объектни ишлегенди. 

Аны бла бирге,  «Диск-Строй» биригиу да быйыл 826 миллионнга беш объектни жангыртырыкъды, аладан эм уллулары Нальчикде  Къабарты орамды.  «РСК» подряд организация да  борчун тынгылы толтурурча уллу сынамы барды. Аны технология эм производство жаны бла  мурдору игиди, ол санда кесини  асфальт  заводу да барды. Быйыл ол 275 миллион сомгъа алты объектге ремонт этерикди.  «РОУЛД» биригиу да   бёлюмде 15 жыл урунады эм  алчы предприятияладан  бирине саналады.  Аны кюннге 600 тонна чыгъаргъан уллу асфальт заводу да ишинде ахшы себепликди.  Быйыл ол 203 милион сом багъасы юч  объектни жангыртырыкъды,  бюгюнлюкде аладан экисинде ишле тамамланнгандыла.  

«Стройресурс» биригиу да быйыл 229 миллион сом багъасына тёрт объектни игилендиреди.  Подряд организацияны бир кюннге  700 тонна асфальт этген заводу, энчи техникалары да  барды.  Аны эм уллу эм магъаналы объектине Нальчикде Къулий улу проспектни санарчады.  «Дорремстрой» быйыл 236 миллон сом багъасына  «Залукокоаже-Зольское-Белокаменское» эм «Куба-Малка» объектлени тапландырлыкъды. «РДСК БЕТОН ГРУПП» биригиу да 116 миллион  сомгъа юч объектге тынгылы ремонт этеди. Аны кесини заводу, энчи техникасы эм сынамлы специалистлери да бардыла. «Мегаполис» бла  «Эльбрусское ДРСУ» подряд организацияла   ючюшер  эм «Элит Строй» эки объектни жангыртадыла. Саулай айтханда, ишлеге 44, 89 эм 115 миллион сом къоратылылкъды.
Къабарты-Малкъарда автомобиль жолланы  кече жарытырча проект да  тири барады. Бусагъатда аны районлада бла шахарлада  «Энергостройгрупп», «Квантэнерго» эм  «Сервис-Строй» биригиуле бардырадыла. Ишлеге саулай 99 миллион сом къоратыллыкъды. Быйыл чыракълы чыпынла  Хушто-Сыртдан Чегем чучхурлагъа  дери участокда,  Плановское бла  Псыхурей эллени ара орамларында  да тартыллыкъдыла.
Арт жыллада жолла мардалагъа келиширча болгъанлары, къоркъуусузлукъ жалчытылгъаны - тротуарла, светофорла, пешеходла жарашдырылгъанлары адамланы да бек къууандырады. Аны бла бирге качестволу жолла, билим бериу, саулукъ сакълау, культура, туризм эм башха бёлюмле  айнырча эм  инвесторла да республикагъа тартынырча себеплик этедиле.